Bhikkhuvibhaṅga
Paṭhamabhāga
Katāpattivāra
Pācittiyakaṇḍa
Sappāṇakavagga
171. 451 Sañcicca pāṇaṁ jīvitā voropento kati āpattiyo āpajjati? Sañcicca pāṇaṁ jīvitā voropento catasso āpattiyo āpajjati. Anodissa opātaṁ khaṇati— “yo koci papatitvā marissatī”ti, āpatti dukkaṭassa; manusso tasmiṁ papatitvā marati, āpatti pārājikassa; yakkho vā peto vā tiracchānagatamanussaviggaho vā tasmiṁ papatitvā marati, āpatti thullaccayassa; tiracchānagato tasmiṁ papatitvā marati, āpatti pācittiyassa— sañcicca pāṇaṁ jīvitā voropento imā catasso āpattiyo āpajjati. (1)
452 Jānaṁ sappāṇakaṁ udakaṁ paribhuñjanto dve āpattiyo āpajjati. Paribhuñjati, payoge dukkaṭaṁ; paribhutte āpatti pācittiyassa. (2)
453 Jānaṁ yathādhammaṁ nihatādhikaraṇaṁ punakammāya ukkoṭento dve āpattiyo āpajjati. Ukkoṭeti, payoge dukkaṭaṁ; ukkoṭite āpatti pācittiyassa. (3)
454 Bhikkhussa jānaṁ duṭṭhullaṁ āpattiṁ paṭicchādento ekaṁ āpattiṁ āpajjati, pācittiyaṁ. (4)
455 Jānaṁ ūnavīsativassaṁ puggalaṁ upasampādento dve āpattiyo āpajjati. Upasampādeti, payoge dukkaṭaṁ; upasampādite āpatti pācittiyassa. (5)
456 Jānaṁ theyyasatthena saddhiṁ saṁvidhāya ekaddhānamaggaṁ paṭipajjanto dve āpattiyo āpajjati. Paṭipajjati, payoge dukkaṭaṁ; paṭipanne āpatti pācittiyassa. (6)
457 Mātugāmena saddhiṁ saṁvidhāya ekaddhānamaggaṁ paṭipajjanto dve āpattiyo āpajjati. Paṭipajjati, payoge dukkaṭaṁ; paṭipanne āpatti pācittiyassa. (7)
458 Pāpikāya diṭṭhiyā yāvatatiyaṁ samanubhāsanāya[75] na paṭinissajjanto dve āpattiyo āpajjati. Ñattiyā dukkaṭaṁ; kammavācāpariyosāne āpatti pācittiyassa. (8)
459 Jānaṁ tathāvādinā bhikkhunā akaṭānudhammena[76] taṁ diṭṭhiṁ appaṭinissaṭṭhena saddhiṁ sambhuñjanto dve āpattiyo āpajjati. Sambhuñjati, payoge dukkaṭaṁ; sambhutte āpatti pācittiyassa. (9)
460 Jānaṁ tathānāsitaṁ samaṇuddesaṁ upalāpento dve āpattiyo āpajjati. Upalāpeti, payoge dukkaṭaṁ; upalāpite āpatti pācittiyassa. (10)
461 Sappāṇakavaggo sattamo.