Bhikkhuvibhaṅga
Paṭhamabhāga
Katāpattivāra
Pārājikakaṇḍa
157. 333 Methunaṁ dhammaṁ paṭisevanto kati āpattiyo āpajjati? Methunaṁ dhammaṁ paṭisevanto tisso āpattiyo āpajjati. Akkhāyite sarīre methunaṁ dhammaṁ paṭisevati, āpatti pārājikassa; yebhuyyena khāyite sarīre methunaṁ dhammaṁ paṭisevati, āpatti thullaccayassa; vaṭṭakate[62] mukhe acchupantaṁ aṅgajātaṁ paveseti, āpatti dukkaṭassa— methunaṁ dhammaṁ paṭisevanto imā tisso āpattiyo āpajjati.
158. 334 Adinnaṁ ādiyanto kati āpattiyo āpajjati? Adinnaṁ ādiyanto tisso āpattiyo āpajjati. Pañcamāsakaṁ vā atirekapañcamāsakaṁ vā agghanakaṁ adinnaṁ theyyasaṅkhātaṁ ādiyati, āpatti pārājikassa; atirekamāsakaṁ vā ūnapañcamāsakaṁ vā agghanakaṁ adinnaṁ theyyasaṅkhātaṁ ādiyati, āpatti thullaccayassa; māsakaṁ vā ūnamāsakaṁ vā agghanakaṁ adinnaṁ theyyasaṅkhātaṁ ādiyati, āpatti dukkaṭassa— adinnaṁ ādiyanto imā tisso āpattiyo āpajjati.
159. 335 Sañcicca manussaviggahaṁ jīvitā voropento kati āpattiyo āpajjati? Sañcicca manussaviggahaṁ jīvitā voropento tisso āpattiyo āpajjati. Manussaṁ odissa opātaṁ khaṇati “papatitvā marissatī”ti, āpatti dukkaṭassa; papatite dukkhā vedanā uppajjati, āpatti thullaccayassa; marati, āpatti pārājikassa— sañcicca manussaviggahaṁ jīvitā voropento imā tisso āpattiyo āpajjati.
160. 336 Asantaṁ abhūtaṁ uttarimanussadhammaṁ ullapanto kati āpattiyo āpajjati? Asantaṁ abhūtaṁ uttarimanussadhammaṁ ullapanto tisso āpattiyo āpajjati. Pāpiccho icchāpakato asantaṁ abhūtaṁ uttarimanussadhammaṁ ullapati, āpatti pārājikassa; “yo te vihāre vasati, so bhikkhu arahā”ti bhaṇati, paṭivijānantassa āpatti thullaccayassa; na paṭivijānantassa āpatti dukkaṭassa— asantaṁ abhūtaṁ uttarimanussadhammaṁ ullapanto imā tisso āpattiyo āpajjati.
337 Cattāro pārājikā niṭṭhitā.
- vaṭṭakate: vivaṭakate (syā1-3), vattakate (pā1) (Word Variant) ↩