Hetusahetukadukādi, Kusalattika
36. 104 Nahetuñceva naahetukañca nakusalaṁ dhammaṁ paṭicca nahetu ceva naahetuko ca nakusalo dhammo uppajjati hetupaccayā. Nahetuñceva naahetukañca nakusalaṁ dhammaṁ paṭicca naahetuko ceva nana ca hetu nakusalo dhammo uppajjati hetupaccayā. Nahetuñceva naahetukañca nakusalaṁ dhammaṁ paṭicca nahetu ceva naahetuko ca nakusalo ca naahetuko ceva nana ca hetu nakusalo ca dhammā uppajjanti hetupaccayā. (3)
105 Naahetukañceva nana ca hetuṁ nakusalaṁ dhammaṁ paṭicca naahetuko ceva nana ca hetu nakusalo dhammo uppajjati hetupaccayā… tīṇi.
106 Nahetuñceva naahetukañca nakusalañca naahetukañceva nana ca hetuṁ nakusalañca dhammaṁ paṭicca nahetu ceva naahetuko ca nakusalo dhammo uppajjati hetupaccayā… tīṇi. (Saṁkhittaṁ.)
107 Hetuyā nava…pe… avigate nava.
37. 108 Nahetuñceva naahetukañca naakusalaṁ dhammaṁ paṭicca nahetu ceva naahetuko ca naakusalo dhammo uppajjati hetupaccayā. (Saṁkhittaṁ.)
109 Hetuyā nava…pe… avigate nava.
38. 110 Nahetuñceva naahetukañca naabyākataṁ dhammaṁ paṭicca nahetu ceva naahetuko ca naabyākato dhammo uppajjati hetupaccayā. (Saṁkhittaṁ.)
111 Hetuyā nava…pe… avigate nava. (Vipākaṁ natthi.)
112 (Hetuhetusampayuttadukaṁ hetusahetukadukasadisaṁ.)