Paccayacatukka

27. 1776 Pītisahagataṁ saraṇaṁ dhammaṁ paṭicca pītisahagato saraṇo dhammo uppajjati hetupaccayā… tīṇi.

1777 Sukhasahagataṁ saraṇaṁ dhammaṁ paṭicca sukhasahagato saraṇo dhammo uppajjati hetupaccayā… tīṇi.

1778 Upekkhāsahagataṁ saraṇaṁ dhammaṁ paṭicca upekkhāsahagato saraṇo dhammo uppajjati hetupaccayā. (1)

1779 Pītisahagataṁ saraṇañca sukhasahagataṁ saraṇañca dhammaṁ paṭicca pītisahagato saraṇo dhammo uppajjati hetupaccayā… tīṇi. (Saṁkhittaṁ.)

1780 Hetuyā dasa…pe… avigate dasa. (Saṁkhittaṁ.)

1781 (Sahajātavārampi…pe… sampayuttavārampi paṭiccavārasadisaṁ.)

28. 1782 Pītisahagato saraṇo dhammo pītisahagatassa saraṇassa dhammassa hetupaccayena paccayo… tīṇi.

1783 Sukhasahagato saraṇo dhammo sukhasahagatassa saraṇassa dhammassa hetupaccayena paccayo… tīṇi.

1784 Upekkhāsahagato saraṇo dhammo upekkhāsahagatassa saraṇassa dhammassa hetupaccayena paccayo. (1)

1785 Pītisahagato saraṇo ca sukhasahagato saraṇo ca dhammā pītisahagatassa saraṇassa dhammassa hetupaccayena paccayo… tīṇi. (Saṁkhittaṁ.)

29. 1786 Hetuyā dasa, ārammaṇe soḷasa, adhipatiyā soḷasa…pe… upanissaye soḷasa…pe… avigate dasa. (Saṁkhittaṁ.)

1787 (Yathā kusalattike pañhāvāraṁ, evaṁ vitthāretabbaṁ.)

30. 1788 Pītisahagataṁ araṇaṁ dhammaṁ paṭicca pītisahagato araṇo dhammo uppajjati hetupaccayā. (Saṁkhittaṁ.)

1789 Hetuyā dasa…pe… avigate dasa. (Saṁkhittaṁ.)

1790 (Sahajātavārepi…pe… pañhāvārepi tattakāva pañhā.)