Kusalattika, Piṭṭhiduka
Kusalattika, Kāmāvacaraduka
Nakāmāvacarapada
Hetu-ārammaṇa
32. 1611 Kusalaṁ nakāmāvacaraṁ dhammaṁ paṭicca kusalo nakāmāvacaro dhammo uppajjati hetupaccayā. (1)
1612 Abyākataṁ nakāmāvacaraṁ dhammaṁ paṭicca abyākato nakāmāvacaro dhammo uppajjati hetupaccayā. (1) (Saṁkhittaṁ.)
1613 Hetuyā dve, ārammaṇe dve…pe… vipāke ekaṁ…pe… avigate dve. (Saṁkhittaṁ.)
1614 (Sahajātavārampi…pe… sampayuttavārampi paṭiccavārasadisaṁ.)
33. 1615 Kusalo nakāmāvacaro dhammo kusalassa nakāmāvacarassa dhammassa hetupaccayena paccayo. (1)
1616 Abyākato nakāmāvacaro dhammo abyākatassa nakāmāvacarassa dhammassa hetupaccayena paccayo. (1)
1617 Kusalo nakāmāvacaro dhammo kusalassa nakāmāvacarassa dhammassa ārammaṇapaccayena paccayo. Kusalo nakāmāvacaro dhammo abyākatassa nakāmāvacarassa dhammassa ārammaṇapaccayena paccayo. (2)
1618 Abyākato nakāmāvacaro dhammo abyākatassa nakāmāvacarassa dhammassa ārammaṇapaccayena paccayo. Abyākato nakāmāvacaro dhammo kusalassa nakāmāvacarassa dhammassa ārammaṇapaccayena paccayo. (2)
34. 1619 Hetuyā dve, ārammaṇe cattāri, adhipatiyā tīṇi, anantare samanantare tīṇi, sahajāte aññamaññe nissaye dve, upanissaye cattāri, āsevane dve, kamme tīṇi, vipāke ekaṁ, āhāre dve…pe… avigate dve. (Saṁkhittaṁ.)
1620 (Yathā kusalattike pañhāvāraṁ, evaṁ vitthāretabbaṁ.)