Hetu

41. 1639 Kusalaṁ pariyāpannaṁ dhammaṁ paṭicca kusalo pariyāpanno dhammo uppajjati hetupaccayā… tīṇi.

1640 Akusalaṁ pariyāpannaṁ dhammaṁ paṭicca akusalo pariyāpanno dhammo uppajjati hetupaccayā… tīṇi.

1641 Abyākataṁ pariyāpannaṁ dhammaṁ paṭicca abyākato pariyāpanno dhammo uppajjati hetupaccayā. (1)

1642 Kusalaṁ pariyāpannañca abyākataṁ pariyāpannañca dhammaṁ paṭicca abyākato pariyāpanno dhammo uppajjati hetupaccayā. (1)

1643 Akusalaṁ pariyāpannañca abyākataṁ pariyāpannañca dhammaṁ paṭicca abyākato pariyāpanno dhammo uppajjati hetupaccayā. (1) (Saṁkhittaṁ.)

42. 1644 Hetuyā nava, ārammaṇe tīṇi…pe… vipāke ekaṁ…pe… avigate nava. (Saṁkhittaṁ.)

1645 (Sahajātavārampi…pe… sampayuttavārampi paṭiccavārasadisaṁ.)

43. 1646 Kusalo pariyāpanno dhammo kusalassa pariyāpannassa dhammassa hetupaccayena paccayo… tīṇi.

1647 Akusalo pariyāpanno dhammo akusalassa pariyāpannassa dhammassa hetupaccayena paccayo… tīṇi.

1648 Abyākato pariyāpanno dhammo abyākatassa pariyāpannassa dhammassa hetupaccayena paccayo. (1) (Saṁkhittaṁ.)

44. 1649 Hetuyā satta, ārammaṇe nava, adhipatiyā nava…pe… avigate terasa. (Saṁkhittaṁ. Yathā kusalattike pañhāvāraṁ, evaṁ vitthāretabbaṁ.)