Kusalattika, Mahantaradukaupādānagocchaka
Kusalattika, Ajjhattikaduka
Paṭiccādivāra
Paccayacatukka
18. 1385 Abyākataṁ ajjhattikaṁ dhammaṁ paṭicca abyākato ajjhattiko dhammo uppajjati hetupaccayā. (Saṁkhittaṁ.)
1386 Hetuyā ekaṁ, sahajāte ekaṁ…pe… avigate ekaṁ. (Saṁkhittaṁ.)
1387 (Sahajātavārampi…pe… sampayuttavārampi paṭiccavārasadisaṁ.)
19. 1388 Kusalo ajjhattiko dhammo kusalassa ajjhattikassa dhammassa ārammaṇapaccayena paccayo. Kusalo ajjhattiko dhammo akusalassa ajjhattikassa dhammassa ārammaṇapaccayena paccayo. Kusalo ajjhattiko dhammo abyākatassa ajjhattikassa dhammassa ārammaṇapaccayena paccayo. (3)
1389 Akusalo ajjhattiko dhammo akusalassa ajjhattikassa dhammassa ārammaṇapaccayena paccayo… tīṇi.
1390 Abyākato ajjhattiko dhammo abyākatassa ajjhattikassa dhammassa ārammaṇapaccayena paccayo… tīṇi. (Saṁkhittaṁ.)
20. 1391 Ārammaṇe nava, adhipatiyā…pe… samanantare satta, sahajāte nissaye ekaṁ, upanissaye nava, purejāte tīṇi, pacchājāte ekaṁ, āsevane tīṇi, vipāke āhāre indriye ekaṁ…pe… vippayutte tīṇi…pe… avigate pañca. (Saṁkhittaṁ.)
1392 (Yathā kusalattike pañhāvāraṁ, evaṁ vitthāretabbaṁ.)
21. 1393 Kusalaṁ bāhiraṁ dhammaṁ paṭicca kusalo bāhiro dhammo uppajjati hetupaccayā. (Saṁkhittaṁ.)
1394 Hetuyā nava, ārammaṇe tīṇi…pe… vipāke ekaṁ…pe… avigate nava. (Saṁkhittaṁ. Sahajātavārampi…pe… sampayuttavārampi paṭiccavārasadisaṁ.)
22. 1395 Kusalo bāhiro dhammo kusalassa bāhirassa dhammassa hetupaccayena paccayo. (Saṁkhittaṁ.)
1396 Hetuyā satta, ārammaṇe nava…pe… avigate terasa. (Saṁkhittaṁ.)
1397 (Yathā kusalattike pañhāvāraṁ, evaṁ vitthāretabbaṁ.)