Kusalattika, Hetugocchaka
Kusalattika, Sahetukaduka
Ahetukapada
Paṭiccādivāra
Paccanīya
Hetu-ārammaṇādi
8. 955 Akusalo ahetuko dhammo abyākatassa ahetukassa dhammassa hetupaccayena paccayo. (1)
956 Akusalo ahetuko dhammo akusalassa ahetukassa dhammassa ārammaṇapaccayena paccayo. Akusalo ahetuko dhammo abyākatassa ahetukassa dhammassa ārammaṇapaccayena paccayo. (2)
957 Abyākato ahetuko dhammo abyākatassa ahetukassa dhammassa ārammaṇapaccayena paccayo. Abyākato ahetuko dhammo akusalassa ahetukassa dhammassa ārammaṇapaccayena paccayo. (2)
958 Akusalo ahetuko dhammo akusalassa ahetukassa dhammassa anantarapaccayena paccayo. Akusalo ahetuko dhammo abyākatassa ahetukassa dhammassa anantarapaccayena paccayo. (2)
959 Abyākato ahetuko dhammo abyākatassa ahetukassa dhammassa anantarapaccayena paccayo. Abyākato ahetuko dhammo akusalassa ahetukassa dhammassa anantarapaccayena paccayo…pe… . (2)
960 Akusalo ahetuko dhammo akusalassa ahetukassa dhammassa upanissayapaccayena paccayo. (Saṁkhittaṁ.)
9. 961 Hetuyā ekaṁ, ārammaṇe cattāri, anantare cattāri, samanantare cattāri, sahajāte tīṇi, aññamaññe ekaṁ, nissaye cattāri, upanissaye cattāri, purejāte pacchājāte āsevane dve, kamme vipāke āhāre indriye jhāne ekaṁ, sampayutte ekaṁ, vippayutte tīṇi…pe… avigate cattāri. (Saṁkhittaṁ.)
962 Nahetuyā pañca, naārammaṇe pañca, naadhipatiyā pañca. (Saṁkhittaṁ.)
963 Hetupaccayā naārammaṇe ekaṁ. (Saṁkhittaṁ.)
964 Nahetupaccayā ārammaṇe cattāri. (Saṁkhittaṁ.)
965 (Yathā kusalattike pañhāvāraṁ, evaṁ vitthāretabbaṁ.)