Ganthagocchaka, Kusalattika
Ganthavippayuttaganthaniyaduka, Kusalattika
Paṭiccādivāra
Paccayacatukka
Hetu
38. 1875 Ganthavippayuttaṁ ganthaniyaṁ kusalaṁ dhammaṁ paṭicca ganthavippayutto ganthaniyo kusalo dhammo uppajjati hetupaccayā. (1)
1876 Ganthavippayuttaṁ aganthaniyaṁ kusalaṁ dhammaṁ paṭicca ganthavippayutto aganthaniyo kusalo dhammo uppajjati hetupaccayā. (1) (Saṁkhittaṁ.)
39. 1877 Hetuyā dve, ārammaṇe dve…pe… avigate dve. (Saṁkhittaṁ.)
1878 (Sahajātavāropi…pe… pañhāvāropi sabbattha vitthāretabbā.)
40. 1879 Ganthavippayuttaṁ ganthaniyaṁ akusalaṁ dhammaṁ paṭicca ganthavippayutto ganthaniyo akusalo dhammo uppajjati hetupaccayā. (Saṁkhittaṁ.)
41. 1880 Hetuyā ekaṁ…pe… avigate ekaṁ. (Saṁkhittaṁ.)
1881 (Sahajātavārepi…pe… pañhāvārepi sabbattha ekaṁ.)
42. 1882 Ganthavippayuttaṁ ganthaniyaṁ abyākataṁ dhammaṁ paṭicca ganthavippayutto ganthaniyo abyākato dhammo uppajjati hetupaccayā. (1)
1883 Ganthavippayuttaṁ aganthaniyaṁ abyākataṁ dhammaṁ paṭicca ganthavippayutto aganthaniyo abyākato dhammo uppajjati hetupaccayā… tīṇi.
1884 Ganthavippayuttaṁ ganthaniyaṁ abyākatañca ganthavippayuttaṁ aganthaniyaṁ abyākatañca dhammaṁ paṭicca ganthavippayutto ganthaniyo abyākato dhammo uppajjati hetupaccayā. (1) (Saṁkhittaṁ.)
43. 1885 Hetuyā pañca, ārammaṇe dve…pe… vipāke pañca…pe… avigate pañca. (Saṁkhittaṁ.)
1886 (Sahajātavārampi…pe… sampayuttavārampi paṭiccavārasadisaṁ.)
44. 1887 Ganthavippayutto ganthaniyo abyākato dhammo ganthavippayuttassa ganthaniyassa abyākatassa dhammassa hetupaccayena paccayo. (1)
1888 Ganthavippayutto aganthaniyo abyākato dhammo ganthavippayuttassa aganthaniyassa abyākatassa dhammassa hetupaccayena paccayo… tīṇi. (Saṁkhittaṁ.)
45. 1889 Hetuyā cattāri, ārammaṇe tīṇi, adhipatiyā cattāri, anantare samanantare cattāri, sahajāte pañca, aññamaññe dve, nissaye satta, upanissaye cattāri, purejāte pacchājāte dve, āsevane ekaṁ, kamme…pe… magge cattāri, sampayutte dve, vippayutte tīṇi…pe… avigate satta. (Saṁkhittaṁ.)
46. 1890 Nahetuyā satta, naārammaṇe satta. (Saṁkhittaṁ.)
1891 Hetupaccayā naārammaṇe cattāri. (Saṁkhittaṁ.)
1892 Nahetupaccayā ārammaṇe tīṇi. (Saṁkhittaṁ.)
1893 (Yathā kusalattike pañhāvārassa anulomampi paccanīyampi anulomapaccanīyampi paccanīyānulomampi gaṇitaṁ, evaṁ gaṇetabbaṁ.)
1894 Ganthagocchakakusalattikaṁ niṭṭhitaṁ.