Saññojanagocchaka, Kusalattika
Saññojanasaññojaniyaduka, Kusalattika
Paṭiccādivāra
Paccayacatukka
Hetu
28. 1756 Saññojaniyañceva no ca saññojanaṁ kusalaṁ dhammaṁ paṭicca saññojaniyo ceva no ca saññojano kusalo dhammo uppajjati hetupaccayā. (Saṁkhittaṁ.)
29. 1757 Hetuyā ekaṁ, ārammaṇe ekaṁ…pe… avigate ekaṁ. (Saṁkhittaṁ.)
1758 (Sahajātavārepi…pe… pañhāvārepi sabbattha ekaṁ.)
30. 1759 Saññojanañceva saññojaniyañca akusalaṁ dhammaṁ paṭicca saññojano ceva saññojaniyo ca akusalo dhammo uppajjati hetupaccayā… tīṇi. (Saṁkhittaṁ.)
31. 1760 Hetuyā nava, ārammaṇe nava, adhipatiyā nava…pe… avigate nava. (Saṁkhittaṁ.)
1761 Nahetuyā tīṇi, naadhipatiyā nava, napurejāte nava, napacchājāte nava, naāsevane nava, nakamme tīṇi, navipāke nava, navippayutte nava. (Saṁkhittaṁ.)
1762 (Sahajātavāropi…pe… sampayuttavāropi paṭiccavārasadisā.)
32. 1763 Saññojano ceva saññojaniyo ca akusalo dhammo saññojanassa ceva saññojaniyassa ca akusalassa dhammassa hetupaccayena paccayo. (Saṁkhittaṁ.)
33. 1764 Hetuyā tīṇi, ārammaṇe nava, adhipatiyā nava…pe… upanissaye āsevane nava, kamme āhāre indriye jhāne tīṇi, magge sampayutte nava…pe… avigate nava. (Saṁkhittaṁ.)
34. 1765 Nahetuyā nava naārammaṇe nava. (Saṁkhittaṁ.)
1766 Hetupaccayā naārammaṇe tīṇi. (Saṁkhittaṁ.)
1767 Nahetupaccayā ārammaṇe nava. (Saṁkhittaṁ.)
1768 (Yathā kusalattike pañhāvārassa anulomampi paccanīyampi anulomapaccanīyampi paccanīyānulomampi gaṇitaṁ, evaṁ gaṇetabbaṁ.)
35. 1769 Saññojaniyañceva no ca saññojanaṁ abyākataṁ dhammaṁ paṭicca saññojaniyo ceva no ca saññojano abyākato dhammo uppajjati hetupaccayā (Saṁkhittaṁ.)
36. 1770 Hetuyā ekaṁ, ārammaṇe ekaṁ…pe… avigate ekaṁ. (Saṁkhittaṁ.)
1771 (Sahajātavārepi…pe… pañhāvārepi sabbattha ekaṁ.)