Āsavagocchaka, Kusalattika
Āsavavippayuttasāsavaduka, Kusalattika
Abyākatapada
Hetu
50. 1685 Āsavavippayuttaṁ sāsavaṁ abyākataṁ dhammaṁ paṭicca āsavavippayutto sāsavo abyākato dhammo uppajjati hetupaccayā. (1)
1686 Āsavavippayuttaṁ anāsavaṁ abyākataṁ dhammaṁ paṭicca āsavavippayutto anāsavo abyākato dhammo uppajjati hetupaccayā. Āsavavippayuttaṁ anāsavaṁ abyākataṁ dhammaṁ paṭicca āsavavippayutto sāsavo abyākato dhammo uppajjati hetupaccayā. Āsavavippayuttaṁ anāsavaṁ abyākataṁ dhammaṁ paṭicca āsavavippayutto sāsavo abyākato ca āsavavippayutto anāsavo abyākato ca dhammā uppajjanti hetupaccayā. (3)
1687 Āsavavippayuttaṁ sāsavaṁ abyākatañca āsavavippayuttaṁ anāsavaṁ abyākatañca dhammaṁ paṭicca āsavavippayutto sāsavo abyākato dhammo uppajjati hetupaccayā. (1) (Saṁkhittaṁ.)
51. 1688 Hetuyā pañca, ārammaṇe dve, adhipatiyā pañca…pe… āsevane ekaṁ, kamme pañca, vipāke pañca…pe… avigate pañca. (Saṁkhittaṁ.)