Hetugocchaka, Kusalattika
Hetusampayuttaduka, Kusalattika
Akusalapada
Paṭiccādivāra
Paccayacatukka
Hetu-ārammaṇa
31. 1319 Hetusampayuttaṁ akusalaṁ dhammaṁ paṭicca hetusampayutto akusalo dhammo uppajjati hetupaccayā. (1)
1320 Hetuvippayuttaṁ akusalaṁ dhammaṁ paṭicca hetusampayutto akusalo dhammo uppajjati hetupaccayā. (1)
1321 Hetusampayuttaṁ akusalañca hetuvippayuttaṁ akusalañca dhammaṁ paṭicca hetusampayutto akusalo dhammo uppajjati hetupaccayā. (1)
1322 Hetusampayuttaṁ akusalaṁ dhammaṁ paṭicca hetusampayutto akusalo dhammo uppajjati ārammaṇapaccayā… tīṇi. (3)
1323 Hetuvippayuttaṁ akusalaṁ dhammaṁ paṭicca hetusampayutto akusalo dhammo uppajjati ārammaṇapaccayā. (1)
1324 Hetusampayuttaṁ akusalañca hetuvippayuttaṁ akusalañca dhammaṁ paṭicca hetusampayutto akusalo dhammo uppajjati ārammaṇapaccayā. (1)
1325 Hetusampayuttaṁ akusalaṁ dhammaṁ paṭicca hetusampayutto akusalo dhammo uppajjati adhipatipaccayā. (Saṁkhittaṁ.)
32. 1326 Hetuyā tīṇi, ārammaṇe pañca, adhipatiyā ekaṁ, anantare pañca, samanantare pañca, sahajāte pañca, aññamaññe pañca, nissaye pañca, upanissaye pañca, purejāte pañca, āsevane pañca, kamme pañca, āhāre pañca, indriye pañca, jhāne pañca, magge pañca, sampayutte pañca, vippayutte pañca, atthiyā pañca…pe… avigate pañca. (Saṁkhittaṁ.)