Mahantaraduka, Kusalattika
Upādāduka, Kusalattika
Paṭiccādivāra
Paccayacatukka
Hetu
92. 2202 Noupādā kusalaṁ dhammaṁ paṭicca noupādā kusalo dhammo uppajjati hetupaccayā. (Saṁkhittaṁ.)
2203 Hetuyā ekaṁ, ārammaṇe ekaṁ…pe… avigate ekaṁ. (Saṁkhittaṁ.)
2204 (Sahajātavārepi…pe… pañhāvārepi sabbattha ekaṁ.)
93. 2205 Noupādā akusalaṁ dhammaṁ paṭicca noupādā akusalo dhammo uppajjati hetupaccayā. (Saṁkhittaṁ.)
2206 Hetuyā ekaṁ, ārammaṇe ekaṁ…pe… avigate ekaṁ. (Saṁkhittaṁ.)
2207 (Sahajātavārepi…pe… pañhāvārepi sabbattha ekaṁ.)
94. 2208 Upādā abyākataṁ dhammaṁ paṭicca noupādā abyākato dhammo uppajjati hetupaccayā. (1)
2209 Noupādā abyākataṁ dhammaṁ paṭicca noupādā abyākato dhammo uppajjati hetupaccayā. Noupādā abyākataṁ dhammaṁ paṭicca upādā abyākato dhammo uppajjati hetupaccayā. Noupādā abyākataṁ dhammaṁ paṭicca upādā abyākato ca noupādā abyākato ca dhammā uppajjanti hetupaccayā. (3)
2210 Upādā abyākatañca noupādā abyākatañca dhammaṁ paṭicca noupādā abyākato dhammo uppajjati hetupaccayā. (1) (Saṁkhittaṁ.)
95. 2211 Hetuyā pañca, ārammaṇe tīṇi…pe… aññamaññe pañca…pe… purejāte ekaṁ, āsevane ekaṁ, kamme pañca, vipāke pañca…pe… avigate pañca. (Saṁkhittaṁ.)
2212 Nahetuyā pañca, naārammaṇe tīṇi, naadhipatiyā pañca…pe… napurejāte pañca…pe… nakamme tīṇi, navipāke tīṇi, naāhāre tīṇi, naindriye tīṇi, najhāne tīṇi, namagge pañca, nasampayutte tīṇi, navippayutte tīṇi, nonatthiyā tīṇi, novigate tīṇi. (Saṁkhittaṁ.)
2213 (Sahajātavārampi…pe… sampayuttavārampi vitthāretabbaṁ.)