Niddesa
Nikkhepakaṇḍa
Dukanikkhepa
Piṭṭhiduka
Dassanenapahātabbaduka
1261. 1962 Katame dhammā dassanena pahātabbā? Tīṇi saññojanāni— sakkāyadiṭṭhi, vicikicchā, sīlabbataparāmāso.
1262. 1963 Tattha katamā sakkāyadiṭṭhi? Idha assutavā puthujjano ariyānaṁ adassāvī ariyadhammassa akovido ariyadhamme avinīto sappurisānaṁ adassāvī sappurisadhammassa akovido sappurisadhamme avinīto rūpaṁ attato samanupassati, rūpavantaṁ vā attānaṁ, attani vā rūpaṁ, rūpasmiṁ vā attānaṁ. Vedanaṁ…pe… saññaṁ…pe… saṅkhāre…pe… viññāṇaṁ attato samanupassati, viññāṇavantaṁ vā attānaṁ, attani vā viññāṇaṁ, viññāṇasmiṁ vā attānaṁ. Yā evarūpā diṭṭhi diṭṭhigataṁ…pe… vipariyāsaggāho— ayaṁ vuccati sakkāyadiṭṭhi.
1263. 1964 Tattha katamā vicikicchā? Satthari kaṅkhati vicikicchati…pe… thambhitattaṁ cittassa manovilekho— ayaṁ vuccati vicikicchā.
1264. 1965 Tattha katamo sīlabbataparāmāso? Ito bahiddhā samaṇabrāhmaṇānaṁ sīlena suddhi vatena suddhi sīlabbatena suddhīti— yā evarūpā diṭṭhi diṭṭhigataṁ…pe… vipariyāsaggāho— ayaṁ vuccati sīlabbataparāmāso. Imāni tīṇi saññojanāni, tadekaṭṭhā ca kilesā, taṁsampayutto vedanākkhandho…pe… viññāṇakkhandho, taṁsamuṭṭhānaṁ kāyakammaṁ vacīkammaṁ manokammaṁ— ime dhammā dassanena pahātabbā.
1265. 1966 Katame dhammā na dassanena pahātabbā? Te dhamme ṭhapetvā avasesā kusalākusalābyākatā dhammā kāmāvacarā, rūpāvacarā, arūpāvacarā, apariyāpannā; vedanākkhandho…pe… viññāṇakkhandho, sabbañca rūpaṁ, asaṅkhatā ca dhātu— ime dhammā na dassanena pahātabbā.