Niddesa
Rūpakaṇḍa
Rūpavibhatti
Pañcaka
967. 1624 Katamaṁ taṁ rūpaṁ pathavīdhātu? Yaṁ kakkhaḷaṁ kharagataṁ[82] kakkhaḷattaṁ kakkhaḷabhāvo ajjhattaṁ vā bahiddhā vā upādinnaṁ vā anupādinnaṁ vā— idaṁ taṁ rūpaṁ pathavīdhātu.
968. 1625 Katamaṁ taṁ rūpaṁ āpodhātu? Yaṁ āpo āpogataṁ sineho sinehagataṁ bandhanattaṁ rūpassa ajjhattaṁ vā bahiddhā vā upādinnaṁ vā anupādinnaṁ vā— idaṁ taṁ rūpaṁ āpodhātu.
969. 1626 Katamaṁ taṁ rūpaṁ tejodhātu? Yaṁ tejo tejogataṁ usmā usmāgataṁ usumaṁ usumagataṁ ajjhattaṁ vā bahiddhā vā upādinnaṁ vā anupādinnaṁ vā— idaṁ taṁ rūpaṁ tejodhātu.
970. 1627 Katamaṁ taṁ rūpaṁ vāyodhātu? Yaṁ vāyo vāyogataṁ thambhitattaṁ rūpassa ajjhattaṁ vā bahiddhā vā upādinnaṁ vā anupādinnaṁ vā— idaṁ taṁ rūpaṁ vāyodhātu.
971. 1628 Katamaṁ taṁ rūpaṁ upādā? Cakkhāyatanaṁ…pe… kabaḷīkāro āhāro— idaṁ taṁ rūpaṁ upādā.
1629 Evaṁ pañcavidhena rūpasaṅgaho.
Pañcakaṁ.
- kharagataṁ: kharigataṁ (ka-ma) (Word Variant) ↩