Niddesa
Cittuppādakaṇḍa
Rūpāvacarakusala
710 Asubhajhānaṁ soḷasakkhattukaṁ
263. 711 Katame dhammā kusalā? Yasmiṁ samaye rūpūpapattiyā maggaṁ bhāveti vivicceva kāmehi…pe… paṭhamaṁ jhānaṁ upasampajja viharati uddhumātakasaññāsahagataṁ, tasmiṁ samaye phasso hoti…pe… avikkhepo hoti…pe… ime dhammā kusalā.
264. 712 Katame dhammā kusalā? Yasmiṁ samaye rūpūpapattiyā maggaṁ bhāveti vivicceva kāmehi…pe… paṭhamaṁ jhānaṁ upasampajja viharati vinīlakasaññāsahagataṁ…pe… vipubbakasaññāsahagataṁ…pe… vicchiddakasaññāsahagataṁ…pe… vikkhāyitakasaññāsahagataṁ…pe… vikkhittakasaññāsahagataṁ…pe… hatavikkhittakasaññāsahagataṁ…pe… lohitakasaññāsahagataṁ…pe… puḷavakasaññāsahagataṁ[53]…pe… aṭṭhikasaññāsahagataṁ, tasmiṁ samaye phasso hoti…pe… avikkhepo hoti…pe… ime dhammā kusalā.
713 Asubhajhānaṁ[54] soḷasakkhattukaṁ.
Rūpāvacarakusalaṁ.