Niddesa
Cittuppādakaṇḍa
Ahetukakiriyāabyākata
Arūpāvacarakiriyā
579. 1089 Katame dhammā abyākatā? Yasmiṁ samaye arūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ākāsānañcāyatanasaññāsahagataṁ sukhassa ca pahānā…pe… catutthaṁ jhānaṁ upasampajja viharati tasmiṁ samaye phasso hoti…pe… avikkhepo hoti…pe… ime dhammā abyākatā.
580. 1090 Katame dhammā abyākatā? Yasmiṁ samaye arūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ sabbaso ākāsānañcāyatanaṁ samatikkamma viññāṇañcāyatanasaññāsahagataṁ sukhassa ca pahānā…pe… catutthaṁ jhānaṁ upasampajja viharati, tasmiṁ samaye phasso hoti…pe… avikkhepo hoti…pe… ime dhammā abyākatā.
581. 1091 Katame dhammā abyākatā? Yasmiṁ samaye arūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ sabbaso viññāṇañcāyatanaṁ samatikkamma ākiñcaññāyatanasaññāsahagataṁ sukhassa ca pahānā…pe… catutthaṁ jhānaṁ upasampajja viharati, tasmiṁ samaye phasso hoti…pe… avikkhepo hoti…pe… ime dhammā abyākatā.
582. 1092 Katame dhammā abyākatā? Yasmiṁ samaye arūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ sabbaso ākiñcaññāyatanaṁ samatikkamma nevasaññānāsaññāyatanasaññāsahagataṁ sukhassa ca pahānā…pe… catutthaṁ jhānaṁ upasampajja viharati, tasmiṁ samaye phasso hoti…pe… avikkhepo hoti…pe… ime dhammā abyākatā…pe… alobho abyākatamūlaṁ…pe… adoso abyākatamūlaṁ…pe… amoho abyākatamūlaṁ…pe… ime dhammā abyākatā.
1093 Arūpāvacarakiriyā.
Kiriyā abyākatā.
1094 Cittuppādakaṇḍaṁ niṭṭhitaṁ.