Opammakathāpañha
Upacikāvagga
Nakulaṅgapañha
259. 1849 “Bhante nāgasena, ‘nakulassa ekaṁ aṅgaṁ gahetabban’ti yaṁ vadesi, katamaṁ taṁ ekaṁ aṅgaṁ gahetabban”ti? “Yathā, mahārāja, nakulo uragamupagacchanto bhesajjena kāyaṁ paribhāvetvā uragamupagacchati gahetuṁ; evameva kho, mahārāja, yoginā yogāvacarena kodhāghātabahulaṁ kalahaviggahavivādavirodhābhibhūtaṁ lokamupagacchantena mettābhesajjena mānasaṁ anulimpitabbaṁ. Idaṁ, mahārāja, nakulassa ekaṁ aṅgaṁ gahetabbaṁ. Bhāsitampetaṁ, mahārāja, therena sāriputtena dhammasenāpatinā—
1850 ‘Tasmā sakaṁ paresampi,
kātabbā mettabhāvanā;
Mettacittena pharitabbaṁ,
etaṁ buddhāna sāsanan’”ti.
1851 Nakulaṅgapañho pañcamo.