Milindapañha
Sativagga
Assubhesajjābhesajjapañha
88. 415 Rājā āha— “bhante nāgasena, yo ca mātari matāya rodati, yo ca dhammapemena rodati, ubhinnaṁ tesaṁ rodantānaṁ kassa assu bhesajjaṁ, kassa na bhesajjan”ti? “Ekassa kho, mahārāja, assu rāgadosamohehi samalaṁ uṇhaṁ, ekassa pītisomanassena vimalaṁ sītalaṁ. Yaṁ kho, mahārāja, sītalaṁ, taṁ bhesajjaṁ, yaṁ uṇhaṁ, taṁ na bhesajjan”ti.
416 “Kallosi, bhante nāgasenā”ti.
417 Assubhesajjābhesajjapañho[118] chaṭṭho.
- Assubhesajjābhesajjapañho: assupañho (maku) (Word Variant) ↩