Milindapañha
Sativagga
Abhijānantasatipañha
93. 430 Rājā āha— “bhante nāgasena, sabbā sati abhijānantī uppajjati, udāhu kaṭumikāva satī”ti? “Abhijānantīpi, mahārāja, kaṭumikāpi satī”ti. “Evañhi kho, bhante nāgasena, sabbā sati abhijānantī, natthi kaṭumikā satī”ti? “Yadi natthi, mahārāja, kaṭumikā sati, natthi kiñci sippikānaṁ kammāyatanehi vā sippāyatanehi vā vijjāṭṭhānehi vā karaṇīyaṁ, niratthakā ācariyā, yasmā ca kho, mahārāja, atthi kaṭumikā sati, tasmā atthi kammāyatanehi vā sippāyatanehi vā vijjāṭṭhānehi vā karaṇīyaṁ, attho ca ācariyehī”ti.
431 “Kallosi, bhante nāgasenā”ti.
432 Abhijānantasatipañho[121] ekādasamo.
433 Sativaggo chaṭṭho.
434 Imasmiṁ vagge ekādasa pañhā.
- Abhijānantasatipañho: satiabhijānanapañho (maku) (Word Variant) ↩