Yuganaddhavagga
Dhammacakkakathā
Iddhipādavāra
42. 1643 “‘Ayaṁ chandasamādhipadhānasaṅkhārasamannāgato iddhipādo’ti me, bhikkhave pubbe ananussutesu dhammesu cakkhuṁ udapādi…pe… āloko udapādi. ‘So kho panāyaṁ chandasamādhipadhānasaṅkhārasamannāgato iddhipādo bhāvetabbo’ti me, bhikkhave…pe… bhāvitoti me, bhikkhave, pubbe ananussutesu dhammesu cakkhuṁ udapādi…pe… āloko udapādi.
1644 Ayaṁ vīriyasamādhi…pe… ayaṁ cittasamādhi…pe… ayaṁ vīmaṁsāsamādhipadhānasaṅkhārasamannāgato iddhipādoti me, bhikkhave, pubbe ananussutesu dhammesu cakkhuṁ udapādi…pe… āloko udapādi. So kho panāyaṁ vīmaṁsāsamādhipadhānasaṅkhārasamannāgato iddhipādo bhāvetabboti me, bhikkhave…pe… bhāvitoti me, bhikkhave, pubbe ananussutesu dhammesu cakkhuṁ udapādi…pe… āloko udapādi”.
1645 “Ayaṁ chandasamādhipadhānasaṅkhārasamannāgato iddhipādo”ti pubbe ananussutesu dhammesu cakkhuṁ udapādi…pe… āloko udapādi…pe… so kho panāyaṁ chandasamādhipadhānasaṅkhārasamannāgato iddhipādo bhāvetabboti…pe… bhāvitoti pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
1646 Cakkhuṁ udapādīti— kenaṭṭhena? Ñāṇaṁ udapādīti— kenaṭṭhena? Paññā udapādīti— kenaṭṭhena? Vijjā udapādīti— kenaṭṭhena? Āloko udapādīti— kenaṭṭhena? Cakkhuṁ udapādīti— dassanaṭṭhena. Ñāṇaṁ udapādīti— ñātaṭṭhena. Paññā udapādīti— pajānanaṭṭhena. Vijjā udapādīti— paṭivedhaṭṭhena. Āloko udapādīti— obhāsaṭṭhena.
1647 Cakkhuṁ dhammo, dassanaṭṭho attho. Ñāṇaṁ dhammo, ñātaṭṭho attho. Paññā dhammo, pajānanaṭṭho attho. Vijjā dhammo, paṭivedhaṭṭho attho. Āloko dhammo, obhāsaṭṭho attho. Ime pañca dhammā pañca atthā chandavatthukā iddhipādavatthukā iddhipādārammaṇā iddhipādagocarā iddhipādasaṅgahitā iddhipādapariyāpannā iddhipāde samudāgatā iddhipāde ṭhitā iddhipāde patiṭṭhitā.
1648 Dhammacakkanti kenaṭṭhena dhammacakkaṁ? Dhammañca pavatteti cakkañcāti— dhammacakkaṁ. Cakkañca pavatteti dhammañcāti— dhammacakkaṁ. Dhammena pavattetīti— dhammacakkaṁ. Dhammacariyāya pavattetīti— dhammacakkaṁ. Dhamme ṭhito pavattetīti— dhammacakkaṁ. Dhamme patiṭṭhito pavattetīti— dhammacakkaṁ. Dhamme patiṭṭhāpento pavattetīti— dhammacakkaṁ. Dhamme vasippatto pavattetīti— dhammacakkaṁ. Dhamme vasiṁ pāpento pavattetīti— dhammacakkaṁ. Dhamme pāramippatto pavattetīti— dhammacakkaṁ. Dhamme pāramiṁ pāpento pavattetīti— dhammacakkaṁ…pe… dhammaṁ apacāyamāno pavattetīti— dhammacakkaṁ. Dhammaddhajo pavattetīti— dhammacakkaṁ. Dhammaketu pavattetīti— dhammacakkaṁ. Dhammādhipateyyo pavattetīti— dhammacakkaṁ. Taṁ kho pana dhammacakkaṁ appaṭivattiyaṁ samaṇena vā brāhmaṇena vā devena vā mārena vā brahmunā vā kenaci vā lokasminti— dhammacakkaṁ.
1649 “Saddhindriyaṁ dhammo. Taṁ dhammaṁ pavattetī”ti— dhammacakkaṁ…pe… amatogadhaṁ nibbānaṁ pariyosānaṭṭhena dhammo. Taṁ dhammaṁ pavattetīti— dhammacakkaṁ.
1650 Ayaṁ vīriyasamādhipadhānasaṅkhārasamannāgato iddhipādoti pubbe ananussutesu dhammesu cakkhuṁ udapādi…pe… āloko udapādi…pe… so kho panāyaṁ vīriyasamādhipadhānasaṅkhārasamannāgato iddhipādo bhāvetabboti…pe… bhāvitoti pubbe ananussutesu dhammesu cakkhuṁ udapādi…pe… āloko udapādi.
1651 Cakkhuṁ udapādīti— kenaṭṭhena…pe… āloko udapādīti— kenaṭṭhena? Cakkhuṁ udapādīti— dassanaṭṭhena…pe… āloko udapādīti— obhāsaṭṭhena.
1652 Cakkhuṁ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā vīriyavatthukā iddhipādavatthukā…pe… cittavatthukā iddhipādavatthukā… vīmaṁsāvatthukā iddhipādavatthukā iddhipādārammaṇā iddhipādagocarā iddhipādasaṅgahitā iddhipādapariyāpannā iddhipāde samudāgatā iddhipāde ṭhitā iddhipāde patiṭṭhitā.
1653 Dhammacakkanti kenaṭṭhena dhammacakkaṁ? Dhammañca pavatteti cakkañcāti— dhammacakkaṁ. Cakkañca pavatteti dhammañcāti— dhammacakkaṁ. Dhammena pavattetīti— dhammacakkaṁ. Dhammacariyāya pavattetīti— dhammacakkaṁ. Dhamme ṭhito pavattetīti— dhammacakkaṁ. Dhamme patiṭṭhito pavattetīti— dhammacakkaṁ…pe… amatogadhaṁ nibbānaṁ pariyosānaṭṭhena dhammo. Taṁ dhammaṁ pavattetīti— dhammacakkanti.
1654 Dhammacakkakathā niṭṭhitā.