Mahānipāta

Mūgapakkhavagga

Suvaṇṇasāmajātaka

296.

1615 “Ko nu maṃ usunā vijjhi,

pamattaṃ udahārakaṃ;

Khattiyo brāhmaṇo vesso,

ko maṃ viddhā nilīyasi.

297.

1616 Na me maṃsāni khajjāni,

Cammenattho na vijjati;

Atha kena nu vaṇṇena,

Viddheyyaṃ maṃ amaññatha.

298.

1617 Ko vā tvaṃ kassa vā putto,

kathaṃ jānemu taṃ mayaṃ;

Puṭṭho me samma akkhāhi,

kiṃ maṃ viddhā nilīyasi”.

299.

1618 “Rājāhamasmi kāsīnaṃ,

pīḷiyakkhoti maṃ vidū;

Lobhā raṭṭhaṃ pahitvāna,

migamesaṃ carāmahaṃ.

300.

1619 Issatthe casmi kusalo,

daḷhadhammoti vissuto;

Nāgopi me na mucceyya,

āgato usupātanaṃ.

301.

1620 Ko vā tvaṃ kassa vā putto,

kathaṃ jānemu taṃ mayaṃ;

Pituno attano cāpi,

nāmagottaṃ pavedaya”.

302.

1621 “Nesādaputto bhaddante,

sāmo iti maṃ ñātayo;

Āmantayiṃsu jīvantaṃ,

svajjevāhaṃ gato saye.

303.

1622 Viddhosmi puthusallena,

savisena yathā migo;

Sakamhi lohite rāja,

passa semi paripluto.

304.

1623 Paṭivāmagataṃ sallaṃ,

passa dhimhāmi lohitaṃ;

Āturo tyānupucchāmi,

kiṃ maṃ viddhā nilīyasi.

305.

1624 Ajinamhi haññate dīpi,

nāgo dantehi haññate;

Atha kena nu vaṇṇena,

viddheyyaṃ maṃ amaññatha”.

306.

1625 “Migo upaṭṭhito āsi,

āgato usupātanaṃ;

Taṃ disvā ubbijī sāma,

tena kodho mamāvisi”.

307.

1626 “Yato sarāmi attānaṃ,

yato pattosmi viññutaṃ;

Na maṃ migā uttasanti,

araññe sāpadānipi.

308.

1627 Yato nidhiṃ parihariṃ,

yato pattosmi yobbanaṃ;

Na maṃ migā uttasanti,

araññe sāpadānipi.

309.

1628 Bhīrū kimpurisā rāja,

pabbate gandhamādane;

Sammodamānā gacchāma,

pabbatāni vanāni ca.

310.

1629 Na maṃ migā uttasanti,

araññe sāpadānipi;

Atha kena nu vaṇṇena,

utrāsanti migā mamaṃ”.

311.

1630 “Na taṃ tasa migo sāma,

kiṃ tāhaṃ alikaṃ bhaṇe;

Kodhalobhābhibhūtāhaṃ,

usuṃ te taṃ avassajiṃ.

312.

1631 Kuto nu sāma āgamma,

kassa vā pahito tuvaṃ;

Udahāro nadiṃ gaccha,

āgato migasammataṃ”.

313.

1632 “Andhā mātāpitā mayhaṃ,

te bharāmi brahāvane;

Tesāhaṃ udakāhāro,

āgato migasammataṃ.

314.

1633 Atthi nesaṃ usāmattaṃ,

atha sāhassa jīvitaṃ;

Udakassa alābhena,

maññe andhā marissare.

315.

1634 Na me idaṃ tathā dukkhaṃ,

labbhā hi pumunā idaṃ;

Yañca ammaṃ na passāmi,

taṃ me dukkhataraṃ ito.

316.

1635 Na me idaṃ tathā dukkhaṃ,

labbhā hi pumunā idaṃ;

Yañca tātaṃ na passāmi,

taṃ me dukkhataraṃ ito.

317.

1636 Sā nūna kapaṇā ammā,

cirarattāya rucchati;

Aḍḍharatte va ratte vā,

nadīva avasucchati.

318.

1637 So nūna kapaṇo tāto,

cirarattāya rucchati;

Aḍḍharatte va ratte vā,

nadīva avasucchati.

319.

1638 Uṭṭhānapādacariyāya,

pādasambāhanassa ca;

Sāma tāta vilapantā,

hiṇḍissanti brahāvane.

320.

1639 Idampi dutiyaṃ sallaṃ,

kampeti hadayaṃ mamaṃ;

Yañca andhe na passāmi,

maññe hissāmi jīvitaṃ”.

321.

1640 “Mā bāḷhaṃ paridevesi,

sāma kalyāṇadassana;

Ahaṃ kammakaro hutvā,

bharissaṃ te brahāvane.

322.

1641 Issatthe casmi kusalo,

daḷhadhammoti vissuto;

Ahaṃ kammakaro hutvā,

bharissaṃ te brahāvane.

323.

1642 Migānaṃ vighāsamanvesaṃ,

Vanamūlaphalāni ca;

Ahaṃ kammakaro hutvā,

Bharissaṃ te brahāvane.

324.

1643 Katamaṃ taṃ vanaṃ sāma,

yattha mātāpitā tava;

Ahaṃ te tathā bharissaṃ,

yathā te abharī tuvaṃ”.

325.

1644 “Ayaṃ ekapadī rāja,

yoyaṃ ussīsake mama;

Ito gantvā aḍḍhakosaṃ,

tattha nesaṃ agārakaṃ;

Yattha mātāpitā mayhaṃ,

te bharassu ito gato.

326.

1645 Namo te kāsirājatthu,

namo te kāsivaḍḍhana;

Andhā mātāpitā mayhaṃ,

te bharassu brahāvane.

327.

1646 Añjaliṃ te paggaṇhāmi,

kāsirāja namatthu te;

Mātaraṃ pitaraṃ mayhaṃ,

vutto vajjāsi vandanaṃ”.

328.

1647 Idaṃ vatvāna so sāmo,

yuvā kalyāṇadassano;

Mucchito visavegena,

visaññī samapajjatha.

329.

1648 Sa rājā paridevesi,

bahuṃ kāruññasañhitaṃ;

“Ajarāmarohaṃ āsiṃ,

ajjetaṃ ñāmi no pure;

Sāmaṃ kālaṅkataṃ disvā,

natthi maccussa nāgamo.

330.

1649 Yassu maṃ paṭimanteti,

savisena samappito;

Svajja evaṃ gate kāle,

na kiñci mabhibhāsati.

331.

1650 Nirayaṃ nūna gacchāmi,

ettha me natthi saṃsayo;

Tadā hi pakataṃ pāpaṃ,

cirarattāya kibbisaṃ.

332.

1651 Bhavanti tassa vattāro,

gāme kibbisakārako;

Araññe nimmanussamhi,

ko maṃ vattumarahati.

333.

1652 Sārayanti hi kammāni,

gāme saṅgaccha māṇavā;

Araññe nimmanussamhi,

ko nu maṃ sārayissati”.

334.

1653 Sā devatā antarahitā,

pabbate gandhamādane;

Raññova anukampāya,

imā gāthā abhāsatha.

335.

1654 “Āguṃ kira mahārāja,

akari kamma dukkaṭaṃ;

Adūsakā pitāputtā,

tayo ekūsunā hatā.

336.

1655 Ehi taṃ anusikkhāmi,

yathā te sugatī siyā;

Dhammenandhe vane posa,

maññehaṃ sugatī tayā”.

337.

1656 Sa rājā paridevitvā,

bahuṃ kāruññasañhitaṃ;

Udakakumbhamādāya,

pakkāmi dakkhiṇāmukho.

338.

1657 “Kassa nu eso padasaddo,

manussasseva āgato;

Neso sāmassa nigghoso,

ko nu tvamasi mārisa.

339.

1658 Santañhi sāmo vajati,

santaṃ pādāni neyati;

Neso sāmassa nigghoso,

ko nu tvamasi mārisa”.

340.

1659 “Rājāhamasmi kāsīnaṃ,

pīḷiyakkhoti maṃ vidū;

Lobhā raṭṭhaṃ pahitvāna,

migamesaṃ carāmahaṃ.

341.

1660 Issatthe casmi kusalo,

daḷhadhammoti vissuto;

Nāgopi me na mucceyya,

āgato usupātanaṃ”.

342.

1661 “Svāgataṃ te mahārāja,

atho te adurāgataṃ;

Issarosi anuppatto,

yaṃ idhatthi pavedaya.

343.

1662 Tindukāni piyālāni,

madhuke kāsumāriyo;

Phalāni khuddakappāni,

bhuñja rāja varaṃ varaṃ.

344.

1663 Idampi pānīyaṃ sītaṃ,

ābhataṃ girigabbharā;

Tato piva mahārāja,

sace tvaṃ abhikaṅkhasi”.

345.

1664 “Nālaṃ andhā vane daṭṭhuṃ,

ko nu vo phalamāhari;

Anandhassevayaṃ sammā,

nivāpo mayha khāyati”.

346.

1665 “Daharo yuvā nātibrahā,

sāmo kalyāṇadassano;

Dīghassa kesā asitā,

atho sūnaggavellitā.

347.

1666 So have phalamāharitvā,

ito ādāya kamaṇḍaluṃ;

Nadiṃ gato udahāro,

maññe na dūramāgato”.

348.

1667 “Ahaṃ taṃ avadhiṃ sāmaṃ,

yo tuyhaṃ paricārako;

Yaṃ kumāraṃ pavedetha,

sāmaṃ kalyāṇadassanaṃ.

349.

1668 Dīghassa kesā asitā,

atho sūnaggavellitā;

Tesu lohitalittesu,

seti sāmo mayā hato”.

350.

1669 “Kena dukūla mantesi,

hato sāmoti vādinā;

Hato sāmoti sutvāna,

hadayaṃ me pavedhati.

351.

1670 Assatthasseva taruṇaṃ,

pavāḷaṃ māluteritaṃ;

Hato sāmoti sutvāna,

hadayaṃ me pavedhati”.

352.

1671 “Pārike kāsirājāyaṃ,

so sāmaṃ migasammate;

Kodhasā usunā vijjhi,

tassa mā pāpamicchimhā”.

353.

1672 “Kicchā laddho piyo putto,

yo andhe abharī vane;

Taṃ ekaputtaṃ ghātimhi,

kathaṃ cittaṃ na kopaye”.

354.

1673 “Kicchā laddho piyo putto,

yo andhe abharī vane;

Taṃ ekaputtaṃ ghātimhi,

akkodhaṃ āhu paṇḍitā”.

355.

1674 “Mā bāḷhaṃ paridevetha,

hato sāmoti vādinā;

Ahaṃ kammakaro hutvā,

bharissāmi brahāvane.

356.

1675 Issatthe casmi kusalo,

daḷhadhammoti vissuto;

Ahaṃ kammakaro hutvā,

bharissāmi brahāvane.

357.

1676 Migānaṃ vighāsamanvesaṃ,

vanamūlaphalāni ca;

Ahaṃ kammakaro hutvā,

bharissāmi brahāvane”.

358.

1677 “Nesa dhammo mahārāja,

netaṃ amhesu kappati;

Rājā tvamasi amhākaṃ,

pāde vandāma te mayaṃ”.

359.

1678 “Dhammaṃ nesādā bhaṇatha,

katā apacitī tayā;

Pitā tvamasi amhākaṃ,

mātā tvamasi pārike”.

360.

1679 “Namo te kāsirājatthu,

namo te kāsivaḍḍhana;

Añjaliṃ te paggaṇhāma,

yāva sāmānupāpaya.

361.

1680 Tassa pāde samajjantā,

mukhañca bhujadassanaṃ;

Saṃsumbhamānā attānaṃ,

kālamāgamayāmase”.

362.

1681 “Brahā vāḷamigākiṇṇaṃ,

ākāsantaṃva dissati;

Yattha sāmo hato seti,

candova patito chamā.

363.

1682 Brahā vāḷamigākiṇṇaṃ,

ākāsantaṃva dissati;

Yattha sāmo hato seti,

sūriyova patito chamā.

364.

1683 Brahā vāḷamigākiṇṇaṃ,

ākāsantaṃva dissati;

Yattha sāmo hato seti,

paṃsunā patikunthito.

365.

1684 Brahā vāḷamigākiṇṇaṃ,

ākāsantaṃva dissati;

Yattha sāmo hato seti,

idheva vasathassame”.

366.

1685 “Yadi tattha sahassāni,

satāni niyutāni ca;

Nevamhākaṃ bhayaṃ koci,

vane vāḷesu vijjati”.

367.

1686 Tato andhānamādāya,

kāsirājā brahāvane;

Hatthe gahetvā pakkāmi,

yattha sāmo hato ahu.

368.

1687 Disvāna patitaṃ sāmaṃ,

puttakaṃ paṃsukunthitaṃ;

Apaviddhaṃ brahāraññe,

candaṃva patitaṃ chamā.

369.

1688 Disvāna patitaṃ sāmaṃ,

puttakaṃ paṃsukunthitaṃ;

Apaviddhaṃ brahāraññe,

sūriyaṃva patitaṃ chamā.

370.

1689 Disvāna patitaṃ sāmaṃ,

puttakaṃ paṃsukunthitaṃ;

Apaviddhaṃ brahāraññe,

kalūnaṃ paridevayuṃ.

371.

1690 Disvāna patitaṃ sāmaṃ,

puttakaṃ paṃsukunthitaṃ;

Bāhā paggayha pakkanduṃ,

“adhammo kira bho iti.

372.

1691 Bāḷhaṃ kho tvaṃ pamattosi,

sāma kalyāṇadassana;

Yo ajjevaṃ gate kāle,

na kiñci mabhibhāsasi.

373.

1692 Bāḷhaṃ kho tvaṃ padittosi,

sāma kalyāṇadassana;

Yo ajjevaṃ gate kāle,

na kiñci mabhibhāsasi.

374.

1693 Bāḷhaṃ kho tvaṃ pakuddhosi,

sāma kalyāṇadassana;

Yo ajjevaṃ gate kāle,

na kiñci mabhibhāsasi.

375.

1694 Bāḷhaṃ kho tvaṃ pasuttosi,

sāma kalyāṇadassana;

Yo ajjevaṃ gate kāle,

na kiñci mabhibhāsasi.

376.

1695 Bāḷhaṃ kho tvaṃ vimanosi,

sāma kalyāṇadassana;

Yo ajjevaṃ gate kāle,

na kiñci mabhibhāsasi.

377.

1696 Jaṭaṃ valinaṃ paṃsugataṃ,

ko dāni saṇṭhapessati;

Sāmo ayaṃ kālaṅkato,

andhānaṃ paricārako.

378.

1697 Ko me sammajjamādāya,

sammajjissati assamaṃ;

Sāmo ayaṃ kālaṅkato,

andhānaṃ paricārako.

379.

1698 Ko dāni nhāpayissati,

sītenuṇhodakena ca;

Sāmo ayaṃ kālaṅkato,

andhānaṃ paricārako.

380.

1699 Ko dāni bhojayissati,

vanamūlaphalāni ca;

Sāmo ayaṃ kālaṅkato,

andhānaṃ paricārako”.

381.

1700 Disvāna patitaṃ sāmaṃ,

puttakaṃ paṃsukunthitaṃ;

Aṭṭitā puttasokena,

mātā saccaṃ abhāsatha.

382.

1701 “Yena saccenayaṃ sāmo,

dhammacārī pure ahu;

Etena saccavajjena,

visaṃ sāmassa haññatu.

383.

1702 Yena saccenayaṃ sāmo,

brahmacārī pure ahu;

Etena saccavajjena,

visaṃ sāmassa haññatu.

384.

1703 Yena saccenayaṃ sāmo,

saccavādī pure ahu;

Etena saccavajjena,

visaṃ sāmassa haññatu.

385.

1704 Yena saccenayaṃ sāmo,

mātāpettibharo ahu;

Etena saccavajjena,

visaṃ sāmassa haññatu.

386.

1705 Yena saccenayaṃ sāmo,

kule jeṭṭhāpacāyiko;

Etena saccavajjena,

visaṃ sāmassa haññatu.

387.

1706 Yena saccenayaṃ sāmo,

pāṇā piyataro mama;

Etena saccavajjena,

visaṃ sāmassa haññatu.

388.

1707 Yaṃ kiñcitthi kataṃ puññaṃ,

Mayhañceva pitucca te;

Sabbena tena kusalena,

Visaṃ sāmassa haññatu”.

389.

1708 Disvāna patitaṃ sāmaṃ,

puttakaṃ paṃsukunthitaṃ;

Aṭṭito puttasokena,

pitā saccaṃ abhāsatha.

390.

1709 “Yena saccenayaṃ sāmo,

dhammacārī pure ahu;

Etena saccavajjena,

visaṃ sāmassa haññatu.

391.

1710 Yena saccenayaṃ sāmo,

brahmacārī pure ahu;

Etena saccavajjena,

visaṃ sāmassa haññatu.

392.

1711 Yena saccenayaṃ sāmo,

saccavādī pure ahu;

Etena saccavajjena,

visaṃ sāmassa haññatu.

393.

1712 Yena saccenayaṃ sāmo,

mātāpettibharo ahu;

Etena saccavajjena,

visaṃ sāmassa haññatu.

394.

1713 Yena saccenayaṃ sāmo,

kule jeṭṭhāpacāyiko;

Etena saccavajjena,

visaṃ sāmassa haññatu.

395.

1714 Yena saccenayaṃ sāmo,

pāṇā piyataro mama;

Etena saccavajjena,

visaṃ sāmassa haññatu.

396.

1715 Yaṃ kiñcitthi kataṃ puññaṃ,

Mayhañceva mātucca te;

Sabbena tena kusalena,

Visaṃ sāmassa haññatu.

397.

1716 Sā devatā antarahitā,

pabbate gandhamādane;

Sāmassa anukampāya,

imaṃ saccaṃ abhāsatha.

398.

1717 Pabbatyāhaṃ gandhamādane,

cirarattanivāsinī;

Na me piyataro koci,

añño sāmena vijjati;

Etena saccavajjena,

visaṃ sāmassa haññatu.

399.

1718 Sabbe vanā gandhamayā,

pabbate gandhamādane;

Etena saccavajjena,

visaṃ sāmassa haññatu”.

400.

1719 Tesaṃ lālappamānānaṃ,

bahuṃ kāruññasañhitaṃ;

Khippaṃ sāmo samuṭṭhāsi,

yuvā kalyāṇadassano.

401.

1720 “Sāmohamasmi bhaddaṃ vo,

Sotthināmhi samuṭṭhito;

Mā bāḷhaṃ paridevetha,

Mañjunābhivadetha maṃ”.

402.

1721 “Svāgataṃ te mahārāja,

atho te adurāgataṃ;

Issarosi anuppatto,

yaṃ idhatthi pavedaya.

403.

1722 Tindukāni piyālāni,

madhuke kāsumāriyo;

Phalāni khuddakappāni,

bhuñja rāja varaṃ varaṃ.

404.

1723 Atthi me pānīyaṃ sītaṃ,

ābhataṃ girigabbharā;

Tato piva mahārāja,

sace tvaṃ abhikaṅkhasi”.

405.

1724 “Sammuyhāmi pamuyhāmi,

sabbā muyhanti me disā;

Petaṃ taṃ sāma maddakkhiṃ,

ko nu tvaṃ sāma jīvasi”.

406.

1725 “Api jīvaṃ mahārāja,

purisaṃ gāḷhavedanaṃ;

Upanītamanasaṅkappaṃ,

jīvantaṃ maññate mataṃ.

407.

1726 Api jīvaṃ mahārāja,

purisaṃ gāḷhavedanaṃ;

Taṃ nirodhagataṃ santaṃ,

jīvantaṃ maññate mataṃ.

408.

1727 Yo mātaraṃ pitaraṃ vā,

macco dhammena posati;

Devāpi naṃ tikicchanti,

mātāpettibharaṃ naraṃ.

409.

1728 Yo mātaraṃ pitaraṃ vā,

macco dhammena posati;

Idheva naṃ pasaṃsanti,

pecca sagge pamodati”.

410.

1729 “Esa bhiyyo pamuyhāmi,

Sabbā muyhanti me disā;

Saraṇaṃ taṃ sāma gacchāmi,

Tvañca me saraṇaṃ bhava”.

411.

1730 “Dhammaṃ cara mahārāja,

mātāpitūsu khattiya;

Idha dhammaṃ caritvāna,

rāja saggaṃ gamissasi.

412.

1731 Dhammaṃ cara mahārāja,

puttadāresu khattiya;

Idha dhammaṃ caritvāna,

rāja saggaṃ gamissasi.

413.

1732 Dhammaṃ cara mahārāja,

mittāmaccesu khattiya;

Idha dhammaṃ caritvāna,

rāja saggaṃ gamissasi.

414.

1733 Dhammaṃ cara mahārāja,

vāhanesu balesu ca;

Idha dhammaṃ caritvāna,

rāja saggaṃ gamissasi.

415.

1734 Dhammaṃ cara mahārāja,

gāmesu nigamesu ca;

Idha dhammaṃ caritvāna,

rāja saggaṃ gamissasi.

416.

1735 Dhammaṃ cara mahārāja,

raṭṭhesu janapadesu ca;

Idha dhammaṃ caritvāna,

rāja saggaṃ gamissasi.

417.

1736 Dhammaṃ cara mahārāja,

samaṇabrāhmaṇesu ca;

Idha dhammaṃ caritvāna,

rāja saggaṃ gamissasi.

418.

1737 Dhammaṃ cara mahārāja,

migapakkhīsu khattiya;

Idha dhammaṃ caritvāna,

rāja saggaṃ gamissasi.

419.

1738 Dhammaṃ cara mahārāja,

dhammo ciṇṇo sukhāvaho;

Idha dhammaṃ caritvāna,

rāja saggaṃ gamissasi.

420.

1739 Dhammaṃ cara mahārāja,

saindā devā sabrahmakā;

Suciṇṇena divaṃ pattā,

mā dhammaṃ rāja pāmado”ti.

1740 Suvaṇṇasāmajātakaṃ tatiyaṃ.