4.5.3 Kuntinījātaka

169.

1101 “Avasimha tavāgāre,

niccaṃ sakkatapūjitā;

Tvameva dānimakari,

handa rāja vajāmahaṃ”.

170.

1102 “Yo ve kate paṭikate,

kibbise paṭikibbise;

Evaṃ taṃ sammatī veraṃ,

vasa kuntini māgamā”.

171.

1103 “Na katassa ca kattā ca,

metti sandhīyate puna;

Hadayaṃ nānujānāti,

gacchaññeva rathesabha”.

172.

1104 “Katassa ceva kattā ca,

metti sandhīyate puna;

Dhīrānaṃ no ca bālānaṃ,

vasa kuntini māgamā”ti.

1105 Kuntinījātakaṃ tatiyaṃ.