4.4.9 Bāverujātaka

153.

1079 “Adassanena morassa,

sikhino mañjubhāṇino;

Kākaṃ tattha apūjesuṃ,

maṃsena ca phalena ca.

154.

1080 Yadā ca sarasampanno,

moro bāverumāgamā;

Atha lābho ca sakkāro,

vāyasassa ahāyatha.

155.

1081 Yāva nuppajjatī buddho,

dhammarājā pabhaṅkaro;

Tāva aññe apūjesuṃ,

puthū samaṇabrāhmaṇe.

156.

1082 Yadā ca sarasampanno,

buddho dhammaṃ adesayi;

Atha lābho ca sakkāro,

titthiyānaṃ ahāyathā”ti.

1083 Bāverujātakaṃ navamaṃ.