4.4.7 Pīṭhajātaka

145.

1069 “Na te pīṭhamadāyimhā,

na pānaṃ napi bhojanaṃ;

Brahmacāri khamassu me,

etaṃ passāmi accayaṃ”.

146.

1070 “Nevābhisajjāmi na cāpi kuppe,

Na cāpi me appiyamāsi kiñci;

Athopi me āsi manovitakko,

Etādiso nūna kulassa dhammo”.

147.

1071 “Esasmākaṃ kule dhammo,

pitupitāmaho sadā;

Āsanaṃ udakaṃ pajjaṃ,

sabbetaṃ nipadāmase.

148.

1072 Esasmākaṃ kule dhammo,

pitupitāmaho sadā;

Sakkaccaṃ upatiṭṭhāma,

uttamaṃ viya ñātakan”ti.

1073 Pīṭhajātakaṃ sattamaṃ.