4.3.2 Duddubhajātaka

85.

992 “Duddubhāyati bhaddante,

yasmiṃ dese vasāmahaṃ;

Ahampetaṃ na jānāmi,

kimetaṃ duddubhāyati”.

86.

993 “Beluvaṃ patitaṃ sutvā,

duddubhanti saso javi;

Sasassa vacanaṃ sutvā,

santattā migavāhinī.

87.

994 Appatvā padaviññāṇaṃ,

paraghosānusārino;

Panādaparamā bālā,

te honti parapattiyā.

88.

995 Ye ca sīlena sampannā,

paññāyūpasame ratā;

Ārakā viratā dhīrā,

na honti parapattiyā”ti.

996 Duddubhajātakaṃ dutiyaṃ.