4.2.5 Sabbamaṃsalābhajātaka

57.

955 “Pharusā vata te vācā,

maṃsaṃ yācanako asi;

Kilomasadisī vācā,

kilomaṃ samma dammi te”.

58.

956 “Aṅgametaṃ manussānaṃ,

bhātā loke pavuccati;

Aṅgassa sadisī vācā,

aṅgaṃ samma dadāmi te”.

59.

957 “Tātāti putto vadamāno,

kampeti hadayaṃ pitu;

Hadayassa sadisī vācā,

hadayaṃ samma dammi te”.

60.

958 “Yassa gāme sakhā natthi,

yathāraññaṃ tatheva taṃ;

Sabbassa sadisī vācā,

sabbaṃ samma dadāmi te”ti.

959 Sabbamaṃsalābhajātakaṃ pañcamaṃ.