4.2.2 Kassapamandiyajātaka

45.

940 “Api kassapa mandiyā,

yuvā sapati hanti vā;

Sabbaṃ taṃ khamate dhīro,

paṇḍito taṃ titikkhati.

46.

941 Sacepi santo vivadanti,

khippaṃ sandhīyare puna;

Bālā pattāva bhijjanti,

na te samathamajjhagū.

47.

942 Ete bhiyyo samāyanti,

sandhi tesaṃ na jīrati;

Yo cādhipannaṃ jānāti,

yo ca jānāti desanaṃ.

48.

943 Eso hi uttaritaro,

Bhāravaho dhuraddharo;

Yo paresādhipannānaṃ,

Sayaṃ sandhātumarahatī”ti.

944 Kassapamandiyajātakaṃ dutiyaṃ.