Tikanipāta
Padumavagga
Khurappajātaka
43. 728 “Disvā khurappe dhanuveganunne,
Khagge gahīte tikhiṇe teladhote;
Tasmiṁ bhayasmiṁ maraṇe viyūḷhe,
Kasmā nu te nāhu chambhitattaṁ”.
44. 729 “Disvā khurappe dhanuveganunne,
Khagge gahīte tikhiṇe teladhote;
Tasmiṁ bhayasmiṁ maraṇe viyūḷhe,
Vedaṁ alatthaṁ vipulaṁ uḷāraṁ.
45. 730 So vedajāto ajjhabhaviṁ amitte,
Pubbeva me jīvitamāsi cattaṁ;
Na hi jīvite ālayaṁ kubbamāno,
Sūro kayirā sūrakiccaṁ kadācī”ti.
731 Khurappajātakaṁ pañcamaṁ.