Dukanipāta
Daḷhavagga
Morajātaka
17. 364 “Udetayañ cakkhumā ekarājā,
Harissavaṇṇo pathavippabhāso[178];
Taṁ taṁ namassāmi harissavaṇṇaṁ pathavippabhāsaṁ,
Tayājja guttā viharemu divasaṁ.
365 Ye brāhmaṇā vedagū sabbadhamme,
Te me namo te ca maṁ pālayantu;
Namatthu buddhānaṁ[179] namatthu bodhiyā,
Namo vimuttānaṁ[180] namo vimuttiyā;
Imaṁ so parittaṁ katvā,
Moro carati esanā.
18. 366 Apetayaṁ cakkhumā ekarājā,
Harissavaṇṇo pathavippabhāso;
Taṁ taṁ namassāmi harissavaṇṇaṁ pathavippabhāsaṁ,
Tayājja guttā viharemu rattiṁ.
367 Ye brāhmaṇā vedagū[181] sabbadhamme,
Te me namo te ca maṁ pālayantu;
Namatthu buddhānaṁ namatthu bodhiyā,
Namo vimuttānaṁ namo vimuttiyā;
Imaṁ so parittaṁ katvā,
Moro vāsamakappayī”ti.
368 Morajātakaṁ navamaṁ.