Pakiṇṇakanipāta
Sālikedāravagga
Sādhinajātaka
202. 2759 “Abbhuto vata lokasmiṁ,
uppajji lomahaṁsano;
Dibbo ratho pāturahu,
vedehassa yasassino”.
203. 2760 Devaputto mahiddhiko,
mātali devasārathi;
Nimantayittha rājānaṁ,
vedehaṁ mithilaggahaṁ. [1733]
204. 2761 “Ehimaṁ rathamāruyha,
rājaseṭṭha disampati;
Devā dassanakāmā te,
tāvatiṁsā saindakā;
Saramānā hi te devā,
sudhammāyaṁ samacchare”.
205. 2762 Tato ca rājā sādhino[1734],
vedeho mithilaggaho[1735];
Sahassayuttamāruyha,
agā devāna santike;
Taṁ devā paṭinandiṁsu,
disvā rājānamāgataṁ. [1736]
206. 2763 “Svāgataṁ te mahārāja,
atho te adurāgataṁ;
Nisīda dāni rājīsi[1737],
devarājassa santike”.
207. 2764 Sakkopi paṭinandittha,
vedehaṁ mithilaggahaṁ;
Nimantayittha kāmehi,
āsanena ca vāsavo. [1738]
208. 2765 “Sādhu khosi anuppatto,
āvāsaṁ vasavattinaṁ;
Vasa devesu rājīsi,
sabbakāmasamiddhisu;
Tāvatiṁsesu devesu,
bhuñja kāme amānuse”.
209. 2766 “Ahaṁ pure saggagato ramāmi,
Naccehi gītehi ca vāditehi;
So dāni ajja na ramāmi sagge,
Āyuṁ nu khīṇo[1739] maraṇaṁ nu santike;
Udāhu mūḷhosmi janindaseṭṭha”.
210. 2767 “Na tāyu[1740] khīṇaṁ maraṇañca[1741] dūre,
Na cāpi mūḷho naravīraseṭṭha;
Tuyhañca puññāni parittakāni,
Yesaṁ vipākaṁ idha vedayittho[1743]. [1742]
211. 2768 Vasa devānubhāvena,
rājaseṭṭha disampati;
Tāvatiṁsesu devesu,
bhuñja kāme amānuse”.
212. 2769 “Yathā yācitakaṁ yānaṁ,
yathā yācitakaṁ dhanaṁ;
Evaṁsampadamevetaṁ,
yaṁ parato dānapaccayā.
213. 2770 Na cāhametamicchāmi,
yaṁ parato dānapaccayā;
Sayaṁkatāni puññāni,
taṁ me āveṇikaṁ[1744] dhanaṁ.
214. 2771 Sohaṁ gantvā manussesu,
kāhāmi kusalaṁ bahuṁ;
Dānena samacariyāya,
saṁyamena damena ca;
Yaṁ katvā sukhito hoti,
na ca pacchānutappati.
215. 2772 Imāni tāni khettāni,
imaṁ nikkhaṁ sukuṇḍalaṁ;
Imā tā haritānūpā,
imā najjo savantiyo.
216. 2773 Imā tā pokkharaṇī rammā,
cakkavākapakūjitā;
Mandālakehi sañchannā,
padumuppalakehi ca;
Yassimāni mamāyiṁsu,
kiṁ nu te disataṁ gatā. [1745]
217. 2774 Tānīdha khettāni so bhūmibhāgo,
Teyeva ārāmavanūpacārā[1746];
Tameva mayhaṁ janataṁ apassato,
Suññaṁva me nārada khāyate disā”.
218. 2775 “Diṭṭhā mayā vimānāni,
obhāsentā catuddisā;
Sammukhā devarājassa,
tidasānañca sammukhā.
219. 2776 Vutthaṁ me bhavanaṁ dibyaṁ[1747],
Bhuttā kāmā amānusā;
Tāvatiṁsesu devesu,
Sabbakāmasamiddhisu.
220. 2777 Sohaṁ etādisaṁ hitvā,
puññāyamhi idhāgato;
Dhammameva carissāmi,
nāhaṁ rajjena atthiko.
221. 2778 Adaṇḍāvacaraṁ maggaṁ,
sammāsambuddhadesitaṁ;
Taṁ maggaṁ paṭipajjissaṁ,
yena gacchanti subbatā”ti.
2779 Sādhinajātakaṁ[1748] ekādasamaṁ.
- mātali: mātalī (sī) (Word Variant) ↩
- sādhino: sādhīno (sī, pā1) (Word Variant) ↩
- mithilaggaho: pamukho rathamāruhi (sī, pā1) (Word Variant) ↩
- Sahassayuttamāruyha: ... yuttaṁ abhiruyha (sī, syā2, syā3) (Word Variant) ↩
- rājīsi: rājisi (sī, syā2, syā3, pā1) (Word Variant) ↩
- Nimantayittha: nimantayī ca (sī, pā1) (Word Variant) ↩
- khīṇo: khīṇaṁ (syā2, syā3) (Word Variant) ↩
- tāyu: na cāyu (sī, pā1, ka-ma) (Word Variant) ↩
- maraṇañca: maraṇaṁ te (sī, pā1) (Word Variant) ↩
- Tuyhañca: tavañca (sī, pā1), tava ca (ka-ma) (Word Variant) ↩
- vedayittho: vedayato (pā1, ka-ma) (Word Variant) ↩
- āveṇikaṁ: āveṇiyaṁ (syā2, syā3, pā1), āvenikaṁ (ka-ma) (Word Variant) ↩
- cakkavākapakūjitā: cakkavākūpakūjitā (sī, pā1), cākavākūpakujjitā (syā2, syā3) (Word Variant) ↩
- ārāmavanūpacārā: te ārāmā te vana'me pacārā (sī, pā1), te yeva ārāmavanāni sañcarā (ka-ma) (Word Variant) ↩
- dibyaṁ: dibbaṁ (sī, pā1) (Word Variant) ↩
- Sādhinajātakaṁ: sādhinarājajātakaṁ (syā2, syā3), sādhīnajātakaṁ (pā1) (Word Variant) ↩