Khattiyāvagga
Puṇṇikātherīapadāna
184. 1402 [384] [383] “Vipassino bhagavato,
sikhino vessabhussa ca;
Kakusandhassa munino,
koṇāgamanatādino.
185. 1403 Kassapassa ca buddhassa,
pabbajitvāna sāsane;
Bhikkhunī sīlasampannā,
nipakā saṁvutindriyā.
186. 1404 Bahussutā dhammadharā,
dhammatthapaṭipucchikā;
Uggahetā ca dhammānaṁ,
sotā payirupāsitā.
187. 1405 Desentī janamajjhehaṁ,
ahosiṁ jinasāsane;
Bāhusaccena tenāhaṁ,
pesalā atimaññisaṁ.
188. 1406 Pacchime ca bhave dāni,
sāvatthiyaṁ puruttame;
Anāthapiṇḍino gehe,
jātāhaṁ kumbhadāsiyā.
189. 1407 Gatā udakahāriyaṁ,
sotthiyaṁ dijamaddasaṁ;
Sītaṭṭaṁ toyamajjhamhi,
taṁ disvā idamabraviṁ.
190. 1408 ‘Udahārī ahaṁ sīte,
sadā udakamotariṁ;
Ayyānaṁ daṇḍabhayabhītā,
vācādosabhayaṭṭitā. [385]
191. 1409 Kassa brāhmaṇa tvaṁ bhīto,
sadā udakamotari;
Vedhamānehi gattehi,
sītaṁ vedayase bhusaṁ’.
192. 1410 ‘Jānantī vata maṁ bhoti,
puṇṇike paripucchasi;
Karontaṁ kusalaṁ kammaṁ,
rundhantaṁ katapāpakaṁ[387]. [386]
193. 1411 Yo ce vuḍḍho daharo vā[388],
pāpakammaṁ pakubbati;
Dakābhisiñcanā sopi[390],
pāpakammā pamuccati’. [389]
194. 1412 Uttarantassa akkhāsiṁ,
dhammatthasaṁhitaṁ padaṁ;
Tañca sutvā[391] sa saṁviggo[392],
pabbajitvārahā ahu.
195. 1413 Pūrentī ūnakasataṁ,
jātā dāsikule yato;
Tato puṇṇāti nāmaṁ me,
bhujissaṁ maṁ akaṁsu te.
196. 1414 Seṭṭhiṁ tatonujānetvā[393],
pabbajiṁ anagāriyaṁ;
Na cireneva kālena,
arahattamapāpuṇiṁ.
197. 1415 Iddhīsu ca vasī homi,
dibbāya sotadhātuyā;
Cetopariyañāṇassa,
vasī homi mahāmune.
198. 1416 Pubbenivāsaṁ jānāmi,
dibbacakkhu visodhitaṁ;
Sabbāsavā parikkhīṇā,
natthi dāni punabbhavo.
199. 1417 Atthadhammaniruttīsu,
paṭibhāne tatheva ca;
Ñāṇaṁ me vimalaṁ suddhaṁ,
buddhaseṭṭhassa vāhasā.
200. 1418 Bhāvanāya mahāpaññā,
suteneva sutāvinī;
Mānena nīcakulajā,
na hi kammaṁ vinassati[394].
201. 1419 Kilesā jhāpitā mayhaṁ,
…pe…
viharāmi anāsavā.
202. 1420 Svāgataṁ vata me āsi,
…pe…
kataṁ buddhassa sāsanaṁ.
203. 1421 Paṭisambhidā catasso,
…pe…
kataṁ buddhassa sāsanaṁ”.
1422 Itthaṁ sudaṁ puṇṇikā[395] bhikkhunī imā gāthāyo abhāsitthāti.
1423 Puṇṇikātheriyāpadānaṁ aṭṭhamaṁ.
- puṇṇāpadānaṁ (sī) (Word Variant) ↩
- 19Th2.236/1 (207 piṭṭhe) (Cross Reference) ↩
- vācādosabhayaṭṭitā: vācārosabhayaṭṭitā (syā2, syā3) (Word Variant) ↩
- rundhantaṁ: nudantaṁ (syā2, syā3), niddhantaṁ (pā1) (Word Variant) ↩
- katapāpakaṁ: kammapāpakaṁ (syā2, syā3) (Word Variant) ↩
- vā: yo vuḍḍho daharo vāpi (sī), yo vuḍḍho daharo cāpi (syā2, syā3), yo ca vuddho daharo vā (pā1) (Word Variant) ↩
- Dakābhisiñcanā: dakābhisocanā () (Word Variant) ↩
- sopi: bhoti (sī, ka-ma) 19Th2.239/1 puṇṇkātherīapadāne (Word Variant) ↩
- sutvā: ñatvā (sī) (Word Variant) ↩
- saṁviggo: susaṁviggo (syā2, syā3), sasaṁviggo (pā1) (Word Variant) ↩
- tatonujānetvā: tato anumodetvā (sī), tatonumodetvā (syā2, syā3), tato 'numānetvā (pā1) (Word Variant) ↩
- vinassati: panassati (syā2, syā3, pā1) (Word Variant) ↩
- puṇṇikā: puṇṇā (sī) (Word Variant) ↩