Ekūposathikavagga

Uppalavaṇṇātherīapadāna

384.

558 “Bhikkhunī uppalavaṇṇā,

iddhiyā pāramiṃ gatā;

Vanditvā satthuno pāde,

idaṃ vacanamabravi.

385.

559 ‘Nitthiṇṇā jātisaṃsāraṃ,

pattāhaṃ acalaṃ padaṃ;

Sabbadukkhaṃ mayā khīṇaṃ,

ārocemi mahāmuni.

386.

560 Yāvatā parisā atthi,

pasannā jinasāsane;

Yassā ca meparādhotthi,

khamantu jinasammukhā.

387.

561 Saṃsāre saṃsarantiyā,

khalitaṃ me sace bhave;

Ārocemi mahāvīra,

aparādhaṃ khamassu taṃ’.

388.

562 ‘Iddhiñcāpi nidassehi,

mama sāsanakārike;

Catasso parisā ajja,

kaṅkhaṃ chindāhi yāvatā’.

389.

563 ‘Dhītā tuyhaṃ mahāvīra,

paññavanta jutindhara;

Bahuñca dukkaraṃ kammaṃ,

kataṃ me atidukkaraṃ.

390.

564 Uppalasseva me vaṇṇo,

nāmenuppalanāmikā;

Sāvikā te mahāvīra,

pāde vandāmi cakkhuma.

391.

565 Rāhulo ca ahañceva,

nekajātisate bahū;

Ekasmiṃ sambhave jātā,

samānachandamānasā.

392.

566 Nibbatti ekato hoti,

jātiyāpi ca ekato;

Pacchime bhave sampatte,

ubhopi nānāsambhavā.

393.

567 Putto ca rāhulo nāma,

dhītā uppalasavhayā;

Passa vīra mamaṃ iddhiṃ,

balaṃ dassemi satthuno’.

394.

568 Mahāsamudde caturo,

pakkhipi hatthapātiyaṃ;

Telaṃ hatthagatañceva,

khiḍḍo komārako yathā.

395.

569 Ubbattayitvā pathaviṃ,

pakkhipi hatthapātiyaṃ;

Cittaṃ muñjaṃ yathā nāma,

luñci komārako yuvā.

396.

570 Cakkavāḷasamaṃ pāṇiṃ,

chādayitvāna matthake;

Vassāpetvāna phusitaṃ,

nānāvaṇṇaṃ punappunaṃ.

397.

571 Bhūmiṃ udukkhalaṃ katvā,

dhaññaṃ katvāna sakkharaṃ;

Sineruṃ musalaṃ katvā,

maddi komārikā yathā.

398.

572 ‘Dhītāhaṃ buddhaseṭṭhassa,

nāmenuppalasavhayā;

Abhiññāsu vasībhūtā,

tava sāsanakārikā.

399.

573 Nānāvikubbanaṃ katvā,

dassetvā lokanāyakaṃ;

Nāmagottañca sāvetvā,

pāde vandāmi cakkhuma.

400.

574 Iddhīsu ca vasī homi,

dibbāya sotadhātuyā;

Cetopariyañāṇassa,

vasī homi mahāmune.

401.

575 Pubbenivāsaṃ jānāmi,

dibbacakkhu visodhitaṃ;

Sabbāsavā parikkhīṇā,

natthi dāni punabbhavo.

402.

576 Atthadhammaniruttīsu,

Paṭibhāne tatheva ca;

Ñāṇaṃ me vimalaṃ suddhaṃ,

Sabhāvena mahesino.

403.

577 Purimānaṃ jinaggānaṃ,

saṅgamaṃ te nidassitaṃ;

Adhikāraṃ bahuṃ mayhaṃ,

tuyhatthāya mahāmuni.

404.

578 Yaṃ mayā pūritaṃ kammaṃ,

Kusalaṃ sara me muni;

Tavatthāya mahāvīra,

Puññaṃ upacitaṃ mayā.

405.

579 Abhabbaṭṭhāne vajjetvā,

vārayantī anācaraṃ;

Tavatthāya mahāvīra,

cattaṃ me jīvituttamaṃ.

406.

580 Dasakoṭisahassāni,

adāsiṃ mama jīvitaṃ;

Pariccattā ca me homi,

tavatthāya mahāmuni’.

407.

581 Tadātivimhitā sabbā,

sirasāva katañjalī;

‘Avocayye kathaṃ āsi,

atuliddhiparakkamā’.

408.

582 Satasahassito kappe,

nāgakaññā ahaṃ tadā;

Vimalā nāma nāmena,

kaññānaṃ sādhusammatā.

409.

583 Mahorago mahānāgo,

pasanno jinasāsane;

Padumuttaraṃ mahātejaṃ,

nimantesi sasāvakaṃ.

410.

584 Ratanamayaṃ maṇḍapaṃ,

pallaṅkaṃ ratanāmayaṃ;

Ratanaṃ vālukākiṇṇaṃ,

upabhogaṃ ratanāmayaṃ.

411.

585 Maggañca paṭiyādesi,

ratanaddhajabhūsitaṃ;

Paccuggantvāna sambuddhaṃ,

vajjanto tūriyehi so.

412.

586 Parisāhi ca catūhi,

parivuto lokanāyako;

Mahoragassa bhavane,

nisīdi paramāsane.

413.

587 Annaṃ pānaṃ khādanīyaṃ,

bhojanañca mahārahaṃ;

Varaṃ varañca pādāsi,

nāgarājā mahāyasaṃ.

414.

588 Bhuñjitvāna sambuddho,

pattaṃ dhovitvā yoniso;

Anumodanīyaṃkāsi,

nāgakaññā mahiddhikā.

415.

589 Sabbaññuṃ phullitaṃ disvā,

nāgakaññā mahāyasaṃ;

Pasannaṃ satthuno cittaṃ,

sunibandhañca mānasaṃ.

416.

590 Mamañca cittamaññāya,

jalajuttamanāmako;

Tasmiṃ khaṇe mahāvīro,

bhikkhuniṃ dassayiddhiyā.

417.

591 Iddhī anekā dassesi,

bhikkhunī sā visāradā;

Pamoditā vedajātā,

satthāraṃ idamabravi.

418.

592 ‘Addasāhaṃ imaṃ iddhiṃ,

sumanaṃ itarāyapi;

Kathaṃ ahosi sā vīra,

iddhiyā suvisāradā’.

419.

593 ‘Orasā mukhato jātā,

dhītā mama mahiddhikā;

Mamānusāsanikarā,

iddhiyā suvisāradā’.

420.

594 Buddhassa vacanaṃ sutvā,

evaṃ patthesahaṃ tadā;

‘Ahampi tādisā homi,

iddhiyā suvisāradā.

421.

595 Pamoditāhaṃ sumanā,

patthe uttamamānasā;

Anāgatamhi addhāne,

īdisā homi nāyaka’.

422.

596 Maṇimayamhi pallaṅke,

maṇḍapamhi pabhassare;

Annapānena tappetvā,

sasaṃghaṃ lokanāyakaṃ.

423.

597 Nāgānaṃ pavaraṃ pupphaṃ,

aruṇaṃ nāma uppalaṃ;

‘Vaṇṇaṃ me īdisaṃ hotu’,

pūjesiṃ lokanāyakaṃ.

424.

598 Tena kammena sukatena,

cetanāpaṇidhīhi ca;

Jahitvā mānusaṃ dehaṃ,

tāvatiṃsamagacchahaṃ.

425.

599 Tato cutāhaṃ manuje,

upapannā sayambhuno;

Uppalehi paṭicchannaṃ,

piṇḍapātamadāsahaṃ.

426.

600 Ekanavutito kappe,

vipassī nāma nāyako;

Uppajji cārudassano,

sabbadhammesu cakkhumā.

427.

601 Seṭṭhidhītā tadā hutvā,

bārāṇasipuruttame;

Nimantetvāna sambuddhaṃ,

sasaṃghaṃ lokanāyakaṃ.

428.

602 Mahādānaṃ daditvāna,

uppalehi vināyakaṃ;

Pūjayitvā cetasāva,

vaṇṇasobhaṃ apatthayiṃ.

429.

603 Imamhi bhaddake kappe,

brahmabandhu mahāyaso;

Kassapo nāma gottena,

uppajji vadataṃ varo.

430.

604 Upaṭṭhāko mahesissa,

tadā āsi narissaro;

Kāsirājā kikī nāma,

bārāṇasipuruttame.

431.

605 Tassāsiṃ dutiyā dhītā,

samaṇaguttasavhayā;

Dhammaṃ sutvā jinaggassa,

pabbajjaṃ samarocayiṃ.

432.

606 Anujāni na no tāto,

agāreva tadā mayaṃ;

Vīsavassasahassāni,

vicarimha atanditā.

433.

607 Komāribrahmacariyaṃ,

rājakaññā sukhedhitā;

Buddhopaṭṭhānaniratā,

muditā sattadhītaro.

434.

608 Samaṇī samaṇaguttā ca,

bhikkhunī bhikkhudāyikā;

Dhammā ceva sudhammā ca,

sattamī saṃghadāyikā.

435.

609 Ahaṃ khemā ca sappaññā,

paṭācārā ca kuṇḍalā;

Kisāgotamī dhammadinnā,

visākhā hoti sattamī.

436.

610 Tehi kammehi sukatehi,

cetanāpaṇidhīhi ca;

Jahitvā mānusaṃ dehaṃ,

tāvatiṃsamagacchahaṃ.

437.

611 Tato cutā manussesu,

upapannā mahākule;

Pītaṃ maṭṭhaṃ varaṃ dussaṃ,

adaṃ arahato ahaṃ.

438.

612 Tato cutāriṭṭhapure,

jātā vippakule ahaṃ;

Dhītā tiriṭivacchassa,

ummādantī manoharā.

439.

613 Tato cutā janapade,

kule aññatare ahaṃ;

Pasūtā nātiphītamhi,

sāliṃ gopemahaṃ tadā.

440.

614 Disvā paccekasambuddhaṃ,

pañcalājāsatānihaṃ;

Datvā padumacchannāni,

pañca puttasatānihaṃ.

441.

615 Patthayiṃ tepi patthesuṃ,

madhuṃ datvā sayambhuno;

Tato cutā araññehaṃ,

ajāyiṃ padumodare.

442.

616 Kāsirañño mahesīhaṃ,

hutvā sakkatapūjitā;

Ajaniṃ rājaputtānaṃ,

anūnaṃ satapañcakaṃ.

443.

617 Yadā te yobbanappattā,

kīḷantā jalakīḷitaṃ;

Disvā opattapadumaṃ,

āsuṃ paccekanāyakā.

444.

618 Sāhaṃ tehi vinābhūtā,

sutavīrehi sokinī;

Cutā isigilipasse,

gāmakamhi ajāyihaṃ.

445.

619 Yadā buddhā sutamatī,

sutānaṃ bhattunopi ca;

Yāguṃ ādāya gacchantī,

aṭṭha paccekanāyake.

446.

620 Bhikkhāya gāmaṃ gacchante,

disvā putte anussariṃ;

Khīradhārā viniggacchi,

tadā me puttapemasā.

447.

621 Tato tesaṃ adaṃ yāguṃ,

pasannā sehi pāṇibhi;

Tato cutāhaṃ tidasaṃ,

nandanaṃ upapajjahaṃ.

448.

622 Anubhotvā sukhaṃ dukkhaṃ,

saṃsaritvā bhavābhave;

Tavatthāya mahāvīra,

pariccattañca jīvitaṃ.

449.

623 Evaṃ bahuvidhaṃ dukkhaṃ,

sampattī ca bahubbidhā;

Pacchime bhave sampatte,

jātā sāvatthiyaṃ pure.

450.

624 Mahādhanaseṭṭhikule,

sukhite sajjite tathā;

Nānāratanapajjote,

sabbakāmasamiddhine.

451.

625 Sakkatā pūjitā ceva,

mānitāpacitā tathā;

Rūpasobhaggasampannā,

kulesu atisakkatā.

452.

626 Atīva patthitā cāsiṃ,

rūpabhogasirīhi ca;

Patthitā seṭṭhiputtehi,

anekehi satehipi.

453.

627 Agāraṃ pajahitvāna,

pabbajiṃ anagāriyaṃ;

Aḍḍhamāse asampatte,

catusaccamapāpuṇiṃ.

454.

628 Iddhiyā abhinimmitvā,

caturassaṃ rathaṃ ahaṃ;

Buddhassa pāde vandissaṃ,

lokanāthassa tādino.

455.

629 ‘Supupphitaggaṃ upagamma pādapaṃ,

Ekā tuvaṃ tiṭṭhasi sālamūle;

Na cāpi te dutiyo atthi koci,

Bāle na tvaṃ bhāyasi dhuttakānaṃ’.

456.

630 ‘Sataṃ sahassānipi dhuttakānaṃ,

Samāgatā edisakā bhaveyyuṃ;

Lomaṃ na iñje na sampavedhe,

Kiṃ me tuvaṃ māra karissaseko.

457.

631 Esā antaradhāyāmi,

kucchiṃ vā pavisāmi te;

Bhamukantarikāyampi,

tiṭṭhantiṃ maṃ na dakkhasi.

458.

632 Cittasmiṃ vasībhūtāmhi,

iddhipādā subhāvitā;

Sabbabandhanamuttāmhi,

na taṃ bhāyāmi āvuso.

459.

633 Sattisūlūpamā kāmā,

khandhāsaṃ adhikuṭṭanā;

Yaṃ tvaṃ kāmaratiṃ brūsi,

aratī dāni sā mama.

460.

634 Sabbattha vihatā nandī,

tamokhandho padālito;

Evaṃ jānāhi pāpima,

nihato tvamasi antaka’.

461.

635 Jino tamhi guṇe tuṭṭho,

etadagge ṭhapesi maṃ;

Aggā iddhimatīnanti,

parisāsu vināyako.

462.

636 Pariciṇṇo mayā satthā,

kataṃ buddhassa sāsanaṃ;

Ohito garuko bhāro,

bhavanettisamūhatā.

463.

637 Yassatthāya pabbajitā,

agārasmānagāriyaṃ;

So me attho anuppatto,

sabbasaṃyojanakkhayo.

464.

638 Cīvaraṃ piṇḍapātañca,

paccayaṃ sayanāsanaṃ;

Khaṇena upanāmenti,

sahassāni samantato.

465.

639 Kilesā jhāpitā mayhaṃ,

…pe…

viharāmi anāsavā.

466.

640 Svāgataṃ vata me āsi,

…pe…

kataṃ buddhassa sāsanaṃ.

467.

641 Paṭisambhidā catasso,

…pe…

kataṃ buddhassa sāsanaṃ”.

642 Itthaṃ sudaṃ uppalavaṇṇā bhikkhunī imā gāthāyo abhāsitthāti.

643 Uppalavaṇṇātheriyāpadānaṃ navamaṃ.