Bhaddiyavagga

Kāḷudāyittheraapadāna

165.

7509 “Padumuttaro nāma jino,

sabbadhammesu cakkhumā;

Ito satasahassamhi,

kappe uppajji nāyako.

166.

7510 Nāyakānaṃ varo satthā,

guṇāguṇavidū jino;

Kataññū katavedī ca,

titthe yojeti pāṇine.

167.

7511 Sabbaññutena ñāṇena,

tulayitvā dayāsayo;

Deseti pavaraṃ dhammaṃ,

anantaguṇasañcayo.

168.

7512 Sa kadāci mahāvīro,

anantajinasaṃsari;

Deseti madhuraṃ dhammaṃ,

catusaccūpasañhitaṃ.

169.

7513 Sutvāna taṃ dhammavaraṃ,

ādimajjhantasobhanaṃ;

Pāṇasatasahassānaṃ,

dhammābhisamayo ahu.

170.

7514 Ninnāditā tadā bhūmi,

gajjiṃsu ca payodharā;

Sādhukāraṃ pavattiṃsu,

devabrahmanarāsurā.

171.

7515 ‘Aho kāruṇiko satthā,

aho saddhammadesanā;

Aho bhavasamuddamhi,

nimugge uddharī jino’.

172.

7516 Evaṃ pavedajātesu,

sanarāmarabrahmasu;

Kulappasādakānaggaṃ,

sāvakaṃ vaṇṇayī jino.

173.

7517 Tadāhaṃ haṃsavatiyaṃ,

jātomaccakule ahuṃ;

Pāsādiko dassaniyo,

pahūtadhanadhaññavā.

174.

7518 Haṃsārāmamupeccāhaṃ,

vanditvā taṃ tathāgataṃ;

Suṇitvā madhuraṃ dhammaṃ,

kāraṃ katvā ca tādino.

175.

7519 Nipacca pādamūlehaṃ,

imaṃ vacanamabraviṃ;

‘Kulappasādakānaggo,

yo tayā santhuto mune.

176.

7520 Tādiso homahaṃ vīra,

buddhaseṭṭhassa sāsane’;

Tadā mahākāruṇiko,

siñcanto vāmatena maṃ.

177.

7521 Āha maṃ ‘putta uttiṭṭha,

lacchase taṃ manorathaṃ;

Kathaṃ nāma jine kāraṃ,

katvāna viphalo siyā.

178.

7522 Satasahassito kappe,

okkākakulasambhavo;

Gotamo nāma gottena,

satthā loke bhavissati.

179.

7523 Tassa dhammesu dāyādo,

oraso dhammanimmito;

Udāyi nāma nāmena,

hessati satthu sāvako’.

180.

7524 Taṃ sutvā mudito hutvā,

yāvajīvaṃ tadā jinaṃ;

Mettacitto paricariṃ,

paccayehi vināyakaṃ.

181.

7525 Tena kammavipākena,

cetanāpaṇidhīhi ca;

Jahitvā mānusaṃ dehaṃ,

tāvatiṃsamagacchahaṃ.

182.

7526 Pacchime ca bhave dāni,

ramme kapilavatthave;

Jāto mahāmaccakule,

suddhodanamahīpate.

183.

7527 Tadā ajāyi siddhattho,

ramme lumbinikānane;

Hitāya sabbalokassa,

sukhāya ca narāsabho.

184.

7528 Tadaheva ahaṃ jāto,

saha teneva vaḍḍhito;

Piyo sahāyo dayito,

viyatto nītikovido.

185.

7529 Ekūnatiṃso vayasā,

nikkhamitvā agārato;

Chabbassaṃ vītināmetvā,

āsi buddho vināyako.

186.

7530 Jetvā sasenakaṃ māraṃ,

khepayitvāna āsave;

Bhavaṇṇavaṃ taritvāna,

buddho āsi sadevake.

187.

7531 Isivhayaṃ gamitvāna,

vinetvā pañcavaggiye;

Tato vinesi bhagavā,

gantvā gantvā tahiṃ tahiṃ.

188.

7532 Veneyye vinayanto so,

saṅgaṇhanto sadevakaṃ;

Upecca magadhe giriṃ,

viharittha tadā jino.

189.

7533 Tadā suddhodanenāhaṃ,

bhūmipālena pesito;

Gantvā disvā dasabalaṃ,

pabbajitvārahā ahuṃ.

190.

7534 Tadā mahesiṃ yācitvā,

pāpayiṃ kapilavhayaṃ;

Tato purāhaṃ gantvāna,

pasādesiṃ mahākulaṃ.

191.

7535 Jino tasmiṃ guṇe tuṭṭho,

maṃ mahāparisāya so;

Kulappasādakānaggaṃ,

paññāpesi vināyako.

192.

7536 Kilesā jhāpitā mayhaṃ,

…pe…

viharāmi anāsavo.

193.

7537 Svāgataṃ vata me āsi,

…pe…

kataṃ buddhassa sāsanaṃ.

194.

7538 Paṭisambhidā catasso,

…pe…

kataṃ buddhassa sāsanaṃ”.

7539 Itthaṃ sudaṃ āyasmā kāḷudāyī thero imā gāthāyo abhāsitthāti.

7540 Kāḷudāyittherassāpadānaṃ chaṭṭhaṃ.