Paṃsukūlavagga

Dhammaruciyattheraapadāna

164.

6365 “Yadā dīpaṅkaro buddho,

sumedhaṃ byākarī jino;

‘Aparimeyye ito kappe,

ayaṃ buddho bhavissati.

165.

6366 Imassa janikā mātā,

māyā nāma bhavissati;

Pitā suddhodano nāma,

ayaṃ hessati gotamo.

166.

6367 Padhānaṃ padahitvāna,

katvā dukkarakārikaṃ;

Assatthamūle sambuddho,

bujjhissati mahāyaso.

167.

6368 Upatisso kolito ca,

aggā hessanti sāvakā;

Ānando nāma nāmena,

upaṭṭhissatimaṃ jinaṃ.

168.

6369 Khemā uppalavaṇṇā ca,

aggā hessanti sāvikā;

Citto āḷavako ceva,

aggā hessantupāsakā.

169.

6370 Khujjuttarā nandamātā,

aggā hessantupāsikā;

Bodhi imassa vīrassa,

assatthoti pavuccati’.

170.

6371 Idaṃ sutvāna vacanaṃ,

asamassa mahesino;

Āmoditā naramarū,

namassanti katañjalī.

171.

6372 Tadāhaṃ māṇavo āsiṃ,

megho nāma susikkhito;

Sutvā byākaraṇaṃ seṭṭhaṃ,

sumedhassa mahāmune.

172.

6373 Saṃvisaṭṭho bhavitvāna,

sumedhe karuṇāsaye;

Pabbajantañca taṃ vīraṃ,

sahāva anupabbajiṃ.

173.

6374 Saṃvuto pātimokkhasmiṃ,

indriyesu ca pañcasu;

Suddhājīvo sato vīro,

jinasāsanakārako.

174.

6375 Evaṃ viharamānohaṃ,

pāpamittena kenaci;

Niyojito anācāre,

sumaggā paridhaṃsito.

175.

6376 Vitakkavasiko hutvā,

sāsanato apakkamiṃ;

Pacchā tena kumittena,

payutto mātughātanaṃ.

176.

6377 Akariṃ ānantariyaṃ,

ghātayiṃ duṭṭhamānaso;

Tato cuto mahāvīciṃ,

upapanno sudāruṇaṃ.

177.

6378 Vinipātagato santo,

saṃsariṃ dukkhito ciraṃ;

Na puno addasaṃ vīraṃ,

sumedhaṃ narapuṅgavaṃ.

178.

6379 Asmiṃ kappe samuddamhi,

maccho āsiṃ timiṅgalo;

Disvāhaṃ sāgare nāvaṃ,

gocaratthamupāgamiṃ.

179.

6380 Disvā maṃ vāṇijā bhītā,

buddhaseṭṭhamanussaruṃ;

Gotamoti mahāghosaṃ,

sutvā tehi udīritaṃ.

180.

6381 Pubbasaññaṃ saritvāna,

tato kālaṅkato ahaṃ;

Sāvatthiyaṃ kule iddhe,

jāto brāhmaṇajātiyaṃ.

181.

6382 Āsiṃ dhammaruci nāma,

sabbapāpajigucchako;

Disvāhaṃ lokapajjotaṃ,

jātiyā sattavassiko.

182.

6383 Mahājetavanaṃ gantvā,

pabbajiṃ anagāriyaṃ;

Upemi buddhaṃ tikkhattuṃ,

rattiyā divasassa ca.

183.

6384 Tadā disvā muni āha,

ciraṃ dhammarucīti maṃ;

Tatohaṃ avacaṃ buddhaṃ,

pubbakammapabhāvitaṃ.

184.

6385 Suciraṃ satapuññalakkhaṇaṃ,

Patipubbena visuddhapaccayaṃ;

Ahamajjasupekkhanaṃ vata,

Tava passāmi nirupamaṃ viggahaṃ.

185.

6386 Suciraṃ vihatattamo mayā,

Sucirakkhena nadī visositā;

Suciraṃ amalaṃ visodhitaṃ,

Nayanaṃ ñāṇamayaṃ mahāmune.

186.

6387 Cirakālasamaṅgito tayā,

Avinaṭṭho punarantaraṃ ciraṃ;

Punarajjasamāgato tayā,

Na hi nassanti katāni gotama.

187.

6388 Kilesā jhāpitā mayhaṃ,

…pe…

viharāmi anāsavo.

188.

6389 Svāgataṃ vata me āsi,

…pe…

kataṃ buddhassa sāsanaṃ.

189.

6390 Paṭisambhidā catasso,

…pe…

kataṃ buddhassa sāsanaṃ”.

6391 Itthaṃ sudaṃ āyasmā dhammaruciyo thero imā gāthāyo abhāsitthāti.

6392 Dhammaruciyattherassāpadānaṃ navamaṃ.