Sakiṃsammajjakavagga

Ekadhammassavaniyattheraapadāna

88.

5569 “Padumuttaro nāma jino,

sabbadhammāna pāragū;

Catusaccaṃ pakāsento,

santāresi bahuṃ janaṃ.

89.

5570 Ahaṃ tena samayena,

jaṭilo uggatāpano;

Dhunanto vākacīrāni,

gacchāmi ambare tadā.

90.

5571 Buddhaseṭṭhassa upari,

gantuṃ na visahāmahaṃ;

Pakkhīva selamāsajja,

gamanaṃ na labhāmahaṃ.

91.

5572 Udake vokkamitvāna,

evaṃ gacchāmi ambare;

Na me idaṃ bhūtapubbaṃ,

iriyāpathavikopanaṃ.

92.

5573 Handa metaṃ gavesissaṃ,

appevatthaṃ labheyyahaṃ;

Orohanto antalikkhā,

saddamassosi satthuno.

93.

5574 Sarena rajanīyena,

savanīyena vaggunā;

Aniccataṃ kathentassa,

taññeva uggahiṃ tadā;

Aniccasaññamuggayha,

agamāsiṃ mamassamaṃ.

94.

5575 Yāvatāyuṃ vasitvāna,

tattha kālaṅkato ahaṃ;

Carime vattamānamhi,

saddhammassavanaṃ sariṃ.

95.

5576 Tena kammena sukatena,

cetanāpaṇidhīhi ca;

Jahitvā mānusaṃ dehaṃ,

tāvatiṃsamagacchahaṃ.

96.

5577 Tiṃsakappasahassāni,

devaloke ramiṃ ahaṃ;

Ekapaññāsakkhattuñca,

devarajjamakārayiṃ.

97.

5578 Ekavīsatikkhattuñca,

cakkavattī ahosahaṃ;

Padesarajjaṃ vipulaṃ,

gaṇanāto asaṅkhiyaṃ.

98.

5579 Anubhomi sakaṃ puññaṃ,

sukhitohaṃ bhavābhave;

Anussarāmi taṃ saññaṃ,

saṃsaranto bhavābhave;

Na koṭiṃ paṭivijjhāmi,

nibbānaṃ accutaṃ padaṃ.

99.

5580 Pitugehe nisīditvā,

samaṇo bhāvitindriyo;

Kathaṃsa paridīpento,

aniccatamudāhari.

100.

5581 ‘Aniccā vata saṅkhārā,

uppādavayadhammino;

Uppajjitvā nirujjhanti,

tesaṃ vūpasamo sukho’.

101.

5582 Saha gāthaṃ suṇitvāna,

pubbasaññamanussariṃ;

Ekāsane nisīditvā,

arahattamapāpuṇiṃ.

102.

5583 Jātiyā sattavassena ,

arahattamapāpuṇiṃ;

Upasampādayī buddho,

dhammassavanassidaṃ phalaṃ.

103.

5584 Satasahassito kappe,

yaṃ dhammamasuṇiṃ tadā;

Duggatiṃ nābhijānāmi,

dhammassavanassidaṃ phalaṃ.

104.

5585 Kilesā jhāpitā mayhaṃ,

…pe…

viharāmi anāsavo.

105.

5586 Svāgataṃ vata me āsi,

…pe…

kataṃ buddhassa sāsanaṃ.

106.

5587 Paṭisambhidā catasso,

…pe…

kataṃ buddhassa sāsanaṃ”.

5588 Itthaṃ sudaṃ āyasmā ekadhammassavaniyo thero imā gāthāyo abhāsitthāti.

5589 Ekadhammassavaniyattherassāpadānaṃ sattamaṃ.