Bhaddālivagga

Ekachattiyattheraapadāna

32.

5282 “Candabhāgānadītīre,

assamo sukato mama;

Susuddhapulinākiṇṇo,

pannasālā sumāpitā.

33.

5283 Uttānakūlā nadikā,

supatitthā manoramā;

Macchakacchapasampannā,

susumāranisevitā.

34.

5284 Acchā dīpī ca mayūrā,

karavīkā ca sāḷikā;

Kūjanti sabbadā ete,

sobhayantā mamassamaṃ.

35.

5285 Kokilā mañjubhāṇī ca,

haṃsā ca madhurassarā;

Abhikūjanti te tattha,

sobhayantā mamassamaṃ.

36.

5286 Sīhā byagghā varāhā ca,

accha kokataracchakā;

Giriduggamhi nādenti,

sobhayantā mamassamaṃ.

37.

5287 Eṇīmigā ca sarabhā,

bheraṇḍā sūkarā bahū;

Giriduggamhi nādenti,

sobhayantā mamassamaṃ.

38.

5288 Uddālakā campakā ca,

pāṭalī sinduvārakā;

Atimuttā asokā ca,

sobhayanti mamassamaṃ.

39.

5289 Aṅkolā yūthikā ceva,

sattalī bimbijālikā;

Kaṇikārā ca pupphanti,

sobhayantā mamassamaṃ.

40.

5290 Nāgā sālā ca saḷalā,

puṇḍarīkettha pupphitā;

Dibbagandhaṃ sampavantā,

sobhayanti mamassamaṃ.

41.

5291 Ajjunā asanā cettha,

mahānāmā ca pupphitā;

Sālā ca kaṅgupupphā ca,

sobhayanti mamassamaṃ.

42.

5292 Ambā jambū ca tilakā,

nimbā ca sālakalyāṇī;

Dibbagandhaṃ sampavantā,

sobhayanti mamassamaṃ.

43.

5293 Asokā ca kapiṭṭhā ca,

girimālettha pupphitā;

Dibbagandhaṃ sampavantā,

sobhayanti mamassamaṃ.

44.

5294 Kadambā kadalī ceva,

isimuggā ca ropitā;

Dhuvaṃ phalāni dhārenti,

sobhayantā mamassamaṃ.

45.

5295 Harītakā āmalakā,

ambajambuvibhītakā;

Kolā bhallātakā billā,

phalino mama assame.

46.

5296 Avidūre pokkharaṇī,

supatitthā manoramā;

Mandālakehi sañchannā,

padumuppalakehi ca.

47.

5297 Gabbhaṃ gaṇhanti padumā,

aññe pupphanti kesarī;

Opattakaṇṇikā ceva,

pupphanti mama assame.

48.

5298 Pāṭhīnā pāvusā macchā,

balajā muñjarohitā;

Acchodakamhi vicaraṃ,

sobhayanti mamassamaṃ.

49.

5299 Nayitā ambagandhī ca,

anukūle ca ketakā;

Dibbagandhaṃ sampavantā,

sobhayanti mamassamaṃ.

50.

5300 Madhu bhisamhā savati,

khīrasappi muḷālibhi;

Dibbagandhaṃ sampavantā,

sobhayanti mamassamaṃ.

51.

5301 Pulinā sobhanā tattha,

ākiṇṇā jalasevitā;

Opupphā pupphitā senti,

sobhayantā mamassamaṃ.

52.

5302 Jaṭābhārena bharitā,

ajinuttaravāsanā;

Vākacīradharā sabbe,

sobhayanti mamassamaṃ.

53.

5303 Yugamattamapekkhantā,

nipakā santavuttino;

Kāmabhoge anapekkhā,

vasanti mama assame.

54.

5304 Parūḷhakacchanakhalomā,

paṅkadantā rajassirā;

Rajojalladharā sabbe,

vasanti mama assame.

55.

5305 Abhiññāpāramippattā,

antalikkhacarā ca te;

Uggacchantā nabhaṃ ete,

sobhayanti mamassamaṃ.

56.

5306 Tehi sissehi parivuto,

vasāmi vipine tadā;

Rattindivaṃ na jānāmi,

sadā jhānasamappito.

57.

5307 Bhagavā tamhi samaye,

atthadassī mahāmuni;

Tamandhakāraṃ nāsento,

uppajji lokanāyako.

58.

5308 Atha aññataro sisso,

āgacchi mama santikaṃ;

Mante ajjhetukāmo so,

chaḷaṅgaṃ nāma lakkhaṇaṃ.

59.

5309 Buddho loke samuppanno,

atthadassī mahāmuni;

Catusaccaṃ pakāsento,

deseti amataṃ padaṃ.

60.

5310 Tuṭṭhahaṭṭho pamudito,

dhammantaragatāsayo;

Assamā abhinikkhamma,

idaṃ vacanamabraviṃ.

61.

5311 ‘Buddho loke samuppanno,

dvattiṃsavaralakkhaṇo;

Etha sabbe gamissāma,

sammāsambuddhasantikaṃ’.

62.

5312 Ovādapaṭikarā te,

sadhamme pāramiṃ gatā;

Sādhūti sampaṭicchiṃsu,

uttamatthagavesakā.

63.

5313 Jaṭābhārabharitā te,

ajinuttaravāsanā;

Uttamatthaṃ gavesantā,

nikkhamiṃsu vanā tadā.

64.

5314 Bhagavā tamhi samaye,

atthadassī mahāyaso;

Catusaccaṃ pakāsento,

deseti amataṃ padaṃ.

65.

5315 Setacchattaṃ gahetvāna,

buddhaseṭṭhassa dhārayiṃ;

Ekāhaṃ dhārayitvāna,

buddhaseṭṭhaṃ avandahaṃ.

66.

5316 Atthadassī tu bhagavā,

lokajeṭṭho narāsabho;

Bhikkhusaṃghe nisīditvā,

imā gāthā abhāsatha.

67.

5317 ‘Yo me chattaṃ adhāresi,

pasanno sehi pāṇibhi;

Tamahaṃ kittayissāmi,

suṇātha mama bhāsato.

68.

5318 Imassa jāyamānassa,

devatte atha mānuse;

Dhāressati sadā chattaṃ,

chattadānassidaṃ phalaṃ.

69.

5319 Sattasattatikappāni,

devaloke ramissati;

Sahassakkhattuṃ rājā ca,

cakkavattī bhavissati.

70.

5320 Sattasattatikkhattuñca,

devarajjaṃ karissati;

Padesarajjaṃ vipulaṃ,

gaṇanāto asaṅkhiyaṃ.

71.

5321 Aṭṭhārase kappasate,

gotamo sakyapuṅgavo;

Tamandhakāraṃ nāsento,

uppajjissati cakkhumā.

72.

5322 Tassa dhammesu dāyādo,

oraso dhammanimmito;

Sabbāsave pariññāya,

viharissatināsavo’.

73.

5323 Yato ahaṃ kammamakaṃ,

chattaṃ buddhassa dhārayaṃ;

Etthantare na jānāmi,

setacchattaṃ adhāritaṃ.

74.

5324 Idaṃ pacchimakaṃ mayhaṃ,

carimo vattate bhavo;

Chattadhāraṇamajjāpi,

vattate niccakālikaṃ.

75.

5325 Aho me sukataṃ kammaṃ,

atthadassissa tādino;

Sabbāsavā parikkhīṇā,

natthi dāni punabbhavo.

76.

5326 Kilesā jhāpitā mayhaṃ,

…pe…

viharāmi anāsavo.

77.

5327 Svāgataṃ vata me āsi,

…pe…

kataṃ buddhassa sāsanaṃ.

78.

5328 Paṭisambhidā catasso,

…pe…

kataṃ buddhassa sāsanaṃ”.

5329 Itthaṃ sudaṃ āyasmā ekachattiyo thero imā gāthāyo abhāsitthāti;

5330 Ekachattiyattherassāpadānaṃ dutiyaṃ.