Bhaddālivagga

Bhaddālittheraapadāna

1.

5249 “Sumedho nāma sambuddho,

aggo kāruṇiko muni;

Vivekakāmo lokaggo,

himavantamupāgami.

2.

5250 Ajjhogāhetvā himavaṃ,

sumedho lokanāyako;

Pallaṅkaṃ ābhujitvāna,

nisīdi purisuttamo.

3.

5251 Samādhiṃ so samāpanno,

sumedho lokanāyako;

Sattarattindivaṃ buddho,

nisīdi purisuttamo.

4.

5252 Khāribhāraṃ gahetvāna,

vanamajjhogahiṃ ahaṃ;

Tatthaddasāsiṃ sambuddhaṃ,

oghatiṇṇamanāsavaṃ.

5.

5253 Sammajjaniṃ gahetvāna,

sammajjitvāna assamaṃ;

Catudaṇḍe ṭhapetvāna,

akāsiṃ maṇḍapaṃ tadā.

6.

5254 Sālapupphaṃ āharitvā,

maṇḍapaṃ chādayiṃ ahaṃ;

Pasannacitto sumano,

abhivandiṃ tathāgataṃ.

7.

5255 Yaṃ vadanti sumedhoti,

bhūripaññaṃ sumedhasaṃ;

Bhikkhusaṃghe nisīditvā,

imā gāthā abhāsatha.

8.

5256 Buddhassa giramaññāya,

sabbe devā samāgamuṃ;

Asaṃsayaṃ buddhaseṭṭho,

dhammaṃ deseti cakkhumā.

9.

5257 Sumedho nāma sambuddho,

āhutīnaṃ paṭiggaho;

Devasaṅghe nisīditvā,

imā gāthā abhāsatha.

10.

5258 ‘Yo me sattāhaṃ maṇḍapaṃ,

dhārayī sālachāditaṃ;

Tamahaṃ kittayissāmi,

suṇātha mama bhāsato.

11.

5259 Devabhūto manusso vā,

hemavaṇṇo bhavissati;

Pahūtabhogo hutvāna,

kāmabhogī bhavissati.

12.

5260 Saṭṭhi nāgasahassāni,

sabbālaṅkārabhūsitā;

Suvaṇṇakacchā mātaṅgā,

hemakappanavāsasā.

13.

5261 Ārūḷhā gāmaṇīyehi,

tomaraṅkusapāṇibhi;

Sāyaṃ pāto upaṭṭhānaṃ,

āgamissantimaṃ naraṃ;

Tehi nāgehi parivuto,

ramissati ayaṃ naro.

14.

5262 Saṭṭhi assasahassāni,

sabbālaṅkārabhūsitā;

Ājānīyāva jātiyā,

sindhavā sīghavāhino.

15.

5263 Ārūḷhā gāmaṇīyehi,

illiyācāpadhāribhi;

Parivāressantimaṃ niccaṃ,

buddhapūjāyidaṃ phalaṃ.

16.

5264 Saṭṭhi rathasahassāni,

sabbālaṅkārabhūsitā;

Dīpā athopi veyagghā,

sannaddhā ussitaddhajā.

17.

5265 Ārūḷhā gāmaṇīyehi,

cāpahatthehi vammibhi;

Parivāressantimaṃ niccaṃ,

buddhapūjāyidaṃ phalaṃ.

18.

5266 Saṭṭhi gāmasahassāni,

paripuṇṇāni sabbaso;

Pahūtadhanadhaññāni,

susamiddhāni sabbaso;

Sadā pātubhavissanti,

buddhapūjāyidaṃ phalaṃ.

19.

5267 Hatthī assā rathā pattī,

senā ca caturaṅginī;

Parivāressantimaṃ niccaṃ,

buddhapūjāyidaṃ phalaṃ.

20.

5268 Aṭṭhārase kappasate,

devaloke ramissati;

Sahassakkhattuṃ rājā ca,

cakkavattī bhavissati.

21.

5269 Satānaṃ tīṇikkhattuñca,

devarajjaṃ karissati;

Padesarajjaṃ vipulaṃ,

gaṇanāto asaṅkhiyaṃ.

22.

5270 Tiṃsakappasahassamhi,

okkākakulasambhavo;

Gotamo nāma gottena,

satthā loke bhavissati.

23.

5271 Tassa dhammesu dāyādo,

oraso dhammanimmito;

Sabbāsave pariññāya,

viharissatināsavo’.

24.

5272 Tiṃsakappasahassamhi,

addasaṃ lokanāyakaṃ;

Etthantaramupādāya,

gavesiṃ amataṃ padaṃ.

25.

5273 Lābhā mayhaṃ suladdhaṃ me,

yamahaññāsi sāsanaṃ;

Tisso vijjā anuppattā,

kataṃ buddhassa sāsanaṃ.

26.

5274 Namo te purisājañña,

namo te purisuttama;

Tava ñāṇaṃ pakittetvā,

pattomhi acalaṃ padaṃ.

27.

5275 Yaṃ yaṃ yonupapajjāmi,

devattaṃ atha mānusaṃ;

Sabbattha sukhito homi,

phalaṃ me ñāṇakittane.

28.

5276 Idaṃ pacchimakaṃ mayhaṃ,

carimo vattate bhavo;

Nāgova bandhanaṃ chetvā,

viharāmi anāsavo.

29.

5277 Kilesā jhāpitā mayhaṃ,

bhavā sabbe samūhatā;

Nāgova bandhanaṃ chetvā,

viharāmi anāsavo.

30.

5278 Svāgataṃ vata me āsi,

mama buddhassa santike;

Tisso vijjā anuppattā,

kataṃ buddhassa sāsanaṃ.

31.

5279 Paṭisambhidā catasso,

vimokkhāpi ca aṭṭhime;

Chaḷabhiññā sacchikatā,

kataṃ buddhassa sāsanaṃ”.

5280 Itthaṃ sudaṃ āyasmā bhaddālitthero imā gāthāyo abhāsitthāti.

5281 Bhaddālittherassāpadānaṃ paṭhamaṃ.