Mahāvibhaṅga
Saṃghādisesakaṇḍa
Bhedānuvattakasikkhāpada
417. 1704 Tena samayena buddho bhagavā rājagahe viharati veḷuvane kalandakanivāpe. Tena kho pana samayena devadatto saṁghabhedāya parakkamati cakkabhedāya. Bhikkhū evamāhaṁsu— “adhammavādī devadatto, avinayavādī devadatto. Kathañhi nāma devadatto saṁghabhedāya parakkamissati cakkabhedāyā”ti. Evaṁ vutte, kokāliko[260] kaṭamodakatissako khaṇḍadeviyā putto samuddadatto[261] te bhikkhū etadavocuṁ— “māyasmanto evaṁ avacuttha. Dhammavādī devadatto, vinayavādī devadatto. Amhākañca devadatto chandañca ruciñca ādāya voharati jānāti no bhāsati amhākampetaṁ khamatī”ti. Ye te bhikkhū appicchā…pe… te ujjhāyanti khiyyanti vipācenti— “kathañhi nāma bhikkhū devadattassa saṁghabhedāya parakkamantassa anuvattakā bhavissanti vaggavādakā”ti.
1705 Atha kho te bhikkhū te anuvattake bhikkhū anekapariyāyena vigarahitvā bhagavato etamatthaṁ ārocesuṁ…pe… “saccaṁ kira, bhikkhave, bhikkhū devadattassa saṁghabhedāya parakkamantassa anuvattakā honti vaggavādakā”ti? “Saccaṁ, bhagavā”ti. Vigarahi buddho bhagavā…pe… kathañhi nāma te, bhikkhave, moghapurisā devadattassa saṁghabhedāya parakkamantassa anuvattakā bhavissanti vaggavādakā. Netaṁ, bhikkhave, appasannānaṁ vā pasādāya…pe… evañca pana, bhikkhave, imaṁ sikkhāpadaṁ uddiseyyātha—
418. 1706 “Tasseva kho pana bhikkhussa bhikkhū honti anuvattakā vaggavādakā eko vā dve vā tayo vā. Te evaṁ vadeyyuṁ— ‘māyasmanto etaṁ bhikkhuṁ kiñci avacuttha. Dhammavādī ceso bhikkhu, vinayavādī ceso bhikkhu. Amhākañceso bhikkhu chandañca ruciñca ādāya voharati jānāti no bhāsati amhākampetaṁ khamatī’ti, te bhikkhū bhikkhūhi evamassu vacanīyā— ‘māyasmanto evaṁ avacuttha, na ceso bhikkhu dhammavādī, na ceso bhikkhu vinayavādī, māyasmantānampi[263] saṁghabhedo ruccittha, sametāyasmantānaṁ saṁghena, samaggo hi saṁgho sammodamāno avivadamāno ekuddeso phāsu viharatī’ti. Evañca te bhikkhū bhikkhūhi vuccamānā tatheva paggaṇheyyuṁ, te bhikkhū bhikkhūhi yāvatatiyaṁ samanubhāsitabbā tassa paṭinissaggāya. Yāvatatiyañce samanubhāsiyamānā taṁ paṭinissajjeyyuṁ, iccetaṁ kusalaṁ, no ce paṭinissajjeyyuṁ, saṁghādiseso”ti. (11:15) [262]
419. 1707 Tasseva kho panāti tassa saṁghabhedakassa bhikkhuno.
1708 Bhikkhū hontīti aññe bhikkhū honti.
1709 Anuvattakāti yaṁdiṭṭhiko so hoti yaṁkhantiko yaṁruciko tepi taṁdiṭṭhikā honti taṁkhantikā taṁrucikā.
1710 Vaggavādakāti tassa vaṇṇāya pakkhāya ṭhitā honti.
1711 Eko vā dve vā tayo vāti eko vā hoti dve vā tayo vā. Te evaṁ vadeyyuṁ— “māyasmanto etaṁ bhikkhuṁ kiñci avacuttha, dhammavādī ceso bhikkhu, vinayavādī ceso bhikkhu, amhākañceso bhikkhu chandañca ruciñca ādāya voharati jānāti no bhāsati amhākampetaṁ khamatī”ti.
1712 Te bhikkhūti ye te anuvattakā bhikkhū.
1713 Bhikkhūhīti aññehi bhikkhūhi.
1714 Ye passanti ye suṇanti tehi vattabbā— “māyasmanto evaṁ avacuttha. Na ceso bhikkhu dhammavādī, na ceso bhikkhu vinayavādī. Māyasmantānampi saṁghabhedo ruccittha. Sametāyasmantānaṁ saṁghena. Samaggo hi saṁgho sammodamāno avivadamāno ekuddeso phāsu viharatī”ti. Dutiyampi vattabbā. Tatiyampi vattabbā. Sace paṭinissajjanti, iccetaṁ kusalaṁ; no ce paṭinissajjanti, āpatti dukkaṭassa. Sutvā na vadanti, āpatti dukkaṭassa. Te bhikkhū saṁghamajjhampi ākaḍḍhitvā vattabbā— “māyasmanto evaṁ avacuttha. Na ceso bhikkhu dhammavādī, na ceso bhikkhu vinayavādī. Māyasmantānampi saṁghabhedo ruccittha. Sametāyasmantānaṁ saṁghena. Samaggo hi saṁgho sammodamāno avivadamāno ekuddeso phāsu viharatī”ti. Dutiyampi vattabbā. Tatiyampi vattabbā. Sace paṭinissajjanti, iccetaṁ kusalaṁ; no ce paṭinissajjanti, āpatti dukkaṭassa. Te bhikkhū samanubhāsitabbā. “Evañca pana, bhikkhave, samanubhāsitabbā. Byattena bhikkhunā paṭibalena saṁgho ñāpetabbo—
420. 1715 ‘Suṇātu me, bhante, saṁgho. Itthannāmo ca itthanāmo ca bhikkhū itthannāmassa bhikkhuno saṁghabhedāya parakkamantassa anuvattakā vaggavādakā. Te taṁ vatthuṁ na paṭinissajjanti. Yadi saṁghassa pattakallaṁ, saṁgho itthannāmañca itthannāmañca bhikkhū samanubhāseyya tassa vatthussa paṭinissaggāya. Esā ñatti.
1716 Suṇātu me, bhante, saṁgho. Itthannāmo ca itthannāmo ca bhikkhū itthannāmassa bhikkhuno saṁghabhedāya parakkamantassa anuvattakā vaggavādakā. Te taṁ vatthuṁ na paṭinissajjanti. Saṁgho itthannāmañca itthannāmañca bhikkhū samanubhāsati tassa vatthussa paṭinissaggāya. Yassāyasmato khamati itthannāmassa ca itthannāmassa ca bhikkhūnaṁ samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
1717 Dutiyampi etamatthaṁ vadāmi…pe… tatiyampi etamatthaṁ vadāmi— suṇātu me, bhante, saṁgho. Itthannāmo ca itthannāmo ca bhikkhū itthannāmassa bhikkhuno saṁghabhedāya parakkamantassa anuvattakā vaggavādakā. Te taṁ vatthuṁ na paṭinissajjanti. Saṁgho itthannāmañca itthannāmañca bhikkhū samanubhāsati tassa vatthussa paṭinissaggāya. Yassāyasmato khamati itthannāmassa ca itthannāmassa ca bhikkhūnaṁ samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
1718 Samanubhaṭṭhā saṁghena itthannāmo ca itthannāmo ca bhikkhū tassa vatthussa paṭinissaggāya. Khamati saṁghassa, tasmā tuṇhī, evametaṁ dhārayāmī’”ti.
421. 1719 Ñattiyā dukkaṭaṁ, dvīhi kammavācāhi thullaccayā, kammavācāpariyosāne āpatti saṁghādisesassa. Saṁghādisesaṁ ajjhāpajjantānaṁ ñattiyā dukkaṭaṁ, dvīhi kammavācāhi thullaccayā paṭippassambhanti. Dve tayo ekato samanubhāsitabbā, taduttari na samanubhāsitabbā.
1720 Saṁghādisesoti…pe… tenapi vuccati “saṁghādiseso”ti.
422. 1721 Dhammakamme dhammakammasaññī[264] na paṭinissajjanti, āpatti saṁghādisesassa.
1722 Dhammakamme vematikā na paṭinissajjanti, āpatti saṁghādisesassa.
1723 Dhammakamme adhammakammasaññī na paṭinissajjanti, āpatti saṁghādisesassa.
1724 Adhammakamme dhammakammasaññī, āpatti dukkaṭassa.
1725 Adhammakamme vematikā, āpatti dukkaṭassa.
1726 Adhammakamme adhammakammasaññī, āpatti dukkaṭassa.
423. 1727 Anāpatti— asamanubhāsantānaṁ, paṭinissajjantānaṁ, ummattakānaṁ, khittacittānaṁ, vedanāṭṭānaṁ, ādikammikānanti.
1728 Bhedānuvattakasikkhāpadaṁ niṭṭhitaṁ ekādasamaṁ.
- kokāliko: kokāliko ca (sī) (Word Variant) ↩
- samuddadatto: samuddadatto ca (sī) (Word Variant) ↩
- 'māyasmanto: mā āyasmanto (sī, syā1-3) (Word Variant) ↩
- māyasmantānampi: mā āyasmantānampi (sī, syā1-3), māyasmantānaṁ pi (pā1) (Word Variant) ↩
- dhammakammasaññī: dhammakammasaññino (ka-sī) (Word Variant) ↩