5.4 Sundarīnandātherīgāthā

82.

127 “Āturaṃ asuciṃ pūtiṃ,

passa nande samussayaṃ;

Asubhāya cittaṃ bhāvehi,

ekaggaṃ susamāhitaṃ.

83.

128 Yathā idaṃ tathā etaṃ,

yathā etaṃ tathā idaṃ;

Duggandhaṃ pūtikaṃ vāti,

bālānaṃ abhinanditaṃ.

84.

129 Evametaṃ avekkhantī,

rattindivamatanditā;

Tato sakāya paññāya,

abhinibbijjha dakkhisaṃ”.

85.

130 “Tassā me appamattāya,

vicinantiyā yoniso;

Yathābhūtaṃ ayaṃ kāyo,

diṭṭho santarabāhiro.

86.

131 Atha nibbindahaṃ kāye,

ajjhattañca virajjahaṃ;

Appamattā visaṃyuttā,

upasantāmhi nibbutā”ti.

132 … Sundarīnandā therī… .