5.1.11 Soṇakuṭikaṇṇattheragāthā

365.

627 “Upasampadā ca me laddhā,

vimutto camhi anāsavo;

So ca me bhagavā diṭṭho,

vihāre ca sahāvasiṃ.

366.

628 Bahudeva rattiṃ bhagavā,

abbhokāsetināmayi;

Vihārakusalo satthā,

vihāraṃ pāvisī tadā.

367.

629 Santharitvāna saṅghāṭiṃ,

seyyaṃ kappesi gotamo;

Sīho selaguhāyaṃva,

pahīnabhayabheravo.

368.

630 Tato kalyāṇavākkaraṇo,

sammāsambuddhasāvako;

Soṇo abhāsi saddhammaṃ,

buddhaseṭṭhassa sammukhā.

369.

631 Pañcakkhandhe pariññāya,

Bhāvayitvāna añjasaṃ;

Pappuyya paramaṃ santiṃ,

Parinibbissatyanāsavo”ti.

632 … Soṇo kuṭikaṇṇatthero… .