4.1.8 Rāhulattheragāthā

295.

538 “Ubhayeneva sampanno,

rāhulabhaddoti maṃ vidū;

Yañcamhi putto buddhassa,

yañca dhammesu cakkhumā.

296.

539 Yañca me āsavā khīṇā,

yañca natthi punabbhavo;

Arahā dakkhiṇeyyomhi,

tevijjo amataddaso.

297.

540 Kāmandhā jālapacchannā,

taṇhāchādanachāditā;

Pamattabandhunā baddhā,

macchāva kumināmukhe.

298.

541 Taṃ kāmaṃ ahamujjhitvā,

chetvā mārassa bandhanaṃ;

Samūlaṃ taṇhamabbuyha,

sītibhūtosmi nibbuto”ti.

542 … Rāhulo thero… .