4.1.7 Sambhūtattheragāthā

291.

533 “Yo dandhakāle tarati,

taraṇīye ca dandhaye;

Ayoni saṃvidhānena,

bālo dukkhaṃ nigacchati.

292.

534 Tassatthā parihāyanti,

kāḷapakkheva candimā;

Āyasakyañca pappoti,

mittehi ca virujjhati.

293.

535 Yo dandhakāle dandheti,

taraṇīye ca tāraye;

Yoniso saṃvidhānena,

sukhaṃ pappoti paṇḍito.

294.

536 Tassatthā paripūrenti,

sukkapakkheva candimā;

Yaso kittiñca pappoti,

mittehi na virujjhatī”ti.

537 … Sambhūto thero… .