4.1.4 Nandakattheragāthā

279.

518 “Dhiratthu pūre duggandhe,

mārapakkhe avassute;

Navasotāni te kāye,

yāni sandanti sabbadā.

280.

519 Mā purāṇaṃ amaññittho,

māsādesi tathāgate;

Saggepi te na rajjanti,

kimaṅgaṃ pana mānuse.

281.

520 Ye ca kho bālā dummedhā,

dummantī mohapārutā;

Tādisā tattha rajjanti,

mārakhittamhi bandhane.

282.

521 Yesaṃ rāgo ca doso ca,

avijjā ca virājitā;

Tādī tattha na rajjanti,

chinnasuttā abandhanā”ti.

522 … Nandako thero… .