Pārāyanavagga
Upasīvamāṇavapucchā
1076. 1263 [580] “Eko ahaṁ sakka mahantamoghaṁ, (iccāyasmā upasīvo)
Anissito no visahāmi tārituṁ;
Ārammaṇaṁ brūhi samantacakkhu,
Yaṁ nissito oghamimaṁ tareyyaṁ”. (1)
1077. 1264 “Ākiñcaññaṁ pekkhamāno satimā, (upasīvāti bhagavā)
Natthīti nissāya tarassu oghaṁ;
Kāme pahāya virato kathāhi,
Taṇhakkhayaṁ nattamahābhipassa[581]”. (2)
1078. 1265 “Sabbesu kāmesu yo vītarāgo, (iccāyasmā upasīvo)
Ākiñcaññaṁ nissito hitvā maññaṁ;
Saññāvimokkhe parame vimutto[582],
Tiṭṭhe nu so tattha anānuyāyī[583]”. (3)
1079. 1266 “Sabbesu kāmesu yo vītarāgo, (upasīvāti bhagavā)
Ākiñcaññaṁ nissito hitvā maññaṁ;
Saññāvimokkhe parame vimutto,
Tiṭṭheyya so tattha anānuyāyī”. (4)
1080. 1267 “Tiṭṭhe ce so tattha anānuyāyī,
Pūgampi vassānaṁ[584] samantacakkhu;
Tattheva so sītisiyā vimutto,
Cavetha viññāṇaṁ tathāvidhassa”. (5)
1081. 1268 “Accī yathā vātavegena khittā[586], (upasīvāti bhagavā)
Atthaṁ paleti na upeti saṅkhaṁ;
Evaṁ munī nāmakāyā vimutto,
Atthaṁ paleti na upeti saṅkhaṁ”. (6) [585]
1082. 1269 “Atthaṅgato so uda vā so natthi,
Udāhu ve sassatiyā arogo;
Taṁ me munī sādhu viyākarohi,
Tathā hi te vidito esa dhammo”. (7)
1083. 1270 “Atthaṅgatassa na pamāṇamatthi, (upasīvāti bhagavā)
Yena naṁ vajjuṁ taṁ tassa natthi;
Sabbesu dhammesu samohatesu[587],
Samūhatā vādapathāpi sabbe”ti. (8)
1271 Upasīvamāṇavapucchā chaṭṭhī.
- (Cross Reference) ↩
- nattamahābhipassa: rattamahābhipassa (syā1-3), rattamahaṁ vipassa (ka-ma) (Word Variant) ↩
- vimutto: paramedhimutto (ka-ma 25Cn:560) (Word Variant) ↩
- anānuyāyī: anānuvāyī (syā1-3, ka-ma) (Word Variant) ↩
- vassānaṁ: vassāni (25Cn:574) 18Sn.A:1267 "pūgampi vassānītipi pāṭho, tattha vibhattibyattayena sāmivacanassa paccattavacanaṁ kattabban"ti (Word Variant) ↩
- "Accī: acci (syā1-3 25Cn:579) (Word Variant) ↩
- khittā: khittaṁ (syā1-3), khitto (pā1) (Word Variant) ↩
- samohatesu: samohatesu (25Cn:591) (Word Variant) ↩