5.15 Mogharājamāṇavapucchā

1123.

1323 “Dvāhaṃ sakkaṃ apucchissaṃ, (iccāyasmā mogharājā)

Na me byākāsi cakkhumā;

Yāvatatiyañca devīsi,

Byākarotīti me sutaṃ. (1)

1124.

1324 Ayaṃ loko paro loko,

brahmaloko sadevako;

Diṭṭhiṃ te nābhijānāti,

gotamassa yasassino. (2)

1125.

1325 Evaṃ abhikkantadassāviṃ,

atthi pañhena āgamaṃ;

Kathaṃ lokaṃ avekkhantaṃ,

maccurājā na passati”. (3)

1126.

1326 “Suññato lokaṃ avekkhassu,

Mogharāja sadā sato;

Attānudiṭṭhiṃ ūhacca,

Evaṃ maccutaro siyā;

Evaṃ lokaṃ avekkhantaṃ,

Maccurājā na passatī”ti. (4)

1327 Mogharājamāṇavapucchā pannarasamā.