4.8 Pasūrasutta

Aṭṭhakavagga

Pasūrasutta

831. 999 ^[451] Idheva suddhī iti vādayanti^[452],
Nāññesu dhammesu visuddhimāhu;
Yaṁ nissitā tattha subhaṁ vadānā,
Paccekasaccesu puthū niviṭṭhā. (1)

832. 1000 Te vādakāmā parisaṁ vigayha,
Bālaṁ dahantī mithu aññamaññaṁ;
Vadanti te aññasitā kathojjaṁ,
Pasaṁsakāmā kusalā vadānā. (2)

833. 1001 Yutto kathāyaṁ parisāya majjhe,
Pasaṁsamicchaṁ vinighāti hoti;
Apāhatasmiṁ pana maṅku hoti,
Nindāya so kuppati randhamesī. (3)

834. 1002 Yamassa vādaṁ parihīnamāhu,
Apāhataṁ pañhavimaṁsakāse;
Paridevati socati hīnavādo,
Upaccagā manti anutthunāti. (4)

835. 1003 Ete vivādā samaṇesu jātā,
Etesu ugghātinighāti hoti;
Etampi disvā virame kathojjaṁ,
Na haññadatthatthi pasaṁsalābhā. (5)

836. 1004 Pasaṁsito vā pana tattha hoti,
Akkhāya vādaṁ parisāya majjhe;
So hassatī unnamatī ca^[453] tena,
Pappuyya tamatthaṁ yathā mano ahu. (6)

837. 1005 Yā unnatī^[454] sāssa vighātabhūmi,
Mānātimānaṁ vadate paneso;
Etampi disvā na vivādayetha,
Na hi tena suddhiṁ kusalā vadanti. (7)

838. 1006 Sūro yathā rājakhādāya puṭṭho,
Abhigajjameti paṭisūramicchaṁ;
Yeneva so tena palehi sūra,
Pubbeva natthi yadidaṁ yudhāya. (8)

839. 1007 Ye diṭṭhimuggayha vivādayanti^[455],
Idameva saccanti ca vādayanti;
Te tvaṁ vadassū na hi tedha atthi,
Vādamhi jāte paṭisenikattā. (9)

840. 1008 Visenikatvā pana ye caranti,
Diṭṭhīhi diṭṭhiṁ avirujjhamānā;
Tesu tvaṁ kiṁ labhetho pasūra,
Yesīdha natthī paramuggahītaṁ. (10)

841. 1009 Atha tvaṁ pavitakkamāgamā,
Manasā diṭṭhigatāni cintayanto;
Dhonena yugaṁ samāgamā,
Na hi tvaṁ sakkhasi sampayātaveti. (11)

1010 Pasūrasuttaṁ aṭṭhamaṁ.