Aṭṭhakavagga
Cūḷabyūhasutta
885. 1057 [486] [485] “Sakaṁsakaṁdiṭṭhiparibbasānā,
Viggayha nānā kusalā vadanti;
Yo evaṁ jānāti sa vedi dhammaṁ,
Idaṁ paṭikkosamakevalī so. (1)
886. 1058 Evampi viggayha vivādayanti,
Bālo paro akkusaloti[487] cāhu;
Sacco nu vādo katamo imesaṁ,
Sabbeva hīme kusalāvadānā”. (2)
887. 1059 “Parassa ce dhammamanānujānaṁ,
Bālomako hoti nihīnapañño;
Sabbeva bālā sunihīnapaññā,
Sabbevime diṭṭhiparibbasānā. (3) [488]
888. 1060 Sandiṭṭhiyā ceva na vīvadātā,
Saṁsuddhapaññā kusalā mutīmā;
Na tesaṁ koci parihīnapañño[489],
Diṭṭhī hi tesampi tathā samattā. (4)
889. 1061 Na vāhametaṁ tathiyanti[490] brūmi,
Yamāhu bālā mithu aññamaññaṁ;
Sakaṁ sakaṁ diṭṭhimakaṁsu saccaṁ,
Tasmā hi bāloti paraṁ dahanti”. (5)
890. 1062 “Yamāhu saccaṁ tathiyanti eke,
Tamāhu aññe[491] tucchaṁ musāti;
Evampi vigayha vivādayanti,
Kasmā na ekaṁ samaṇā vadanti”. (6)
891. 1063 “Ekañhi saccaṁ na dutīyamatthi,
Yasmiṁ pajā no vivade pajānaṁ;
Nānā te[492] saccāni sayaṁ thunanti,
Tasmā na ekaṁ samaṇā vadanti”. (7)
892. 1064 “Kasmā nu saccāni vadanti nānā,
Pavādiyāse kusalāvadānā;
Saccāni sutāni bahūni nānā,
Udāhu te takkamanussaranti”. (8)
893. 1065 “Na heva saccāni bahūni nānā,
Aññatra saññāya niccāni loke;
Takkañca diṭṭhīsu pakappayitvā,
Saccaṁ musāti dvayadhammamāhu. (9)
894. 1066 Diṭṭhe sute sīlavate mute vā,
Ete ca nissāya vimānadassī;
Vinicchaye ṭhatvā pahassamāno,
Bālo paro akkusaloti cāha. (10)
895. 1067 Yeneva bāloti paraṁ dahāti,
Tenātumānaṁ kusaloti cāha;
Sayamattanā so kusalāvadāno,
Aññaṁ vimāneti tadeva pāva. (11)
896. 1068 Atisāradiṭṭhiyā so samatto,
Mānena matto paripuṇṇamānī;
Sayameva sāmaṁ manasābhisitto,
Diṭṭhī hi sā tassa tathā samattā. (12) [493]
897. 1069 Parassa ce hi vacasā nihīno,
Tumo sahā hoti nihīnapañño;
Atha ce sayaṁ vedagū hoti dhīro,
Na koci bālo samaṇesu atthi. (13)
898. 1070 Aññaṁ ito yābhivadanti dhammaṁ,
Aparaddhā suddhimakevalī te[494];
Evampi titthyā puthuso vadanti,
Sandiṭṭhirāgena hi tebhirattā[495]. (14)
899. 1071 Idheva suddhiṁ iti vādayanti,
Nāññesu dhammesu visuddhimāhu;
Evampi titthyā puthuso niviṭṭhā,
Sakāyane tattha daḷhaṁ vadānā. (15)
900. 1072 Sakāyane vāpi daḷhaṁ vadāno,
Kamettha bāloti paraṁ daheyya;
Sayaṁva so medhagamāvaheyya[496],
Paraṁ vadaṁ bālamasuddhidhammaṁ. (16)
901. 1073 Vinicchaye ṭhatvā sayaṁ pamāya,
Uddhaṁsa lokasmiṁ vivādameti;
Hitvāna sabbāni vinicchayāni,
Na medhagaṁ kubbati jantu loke”ti. (17) [497]
1074 Cūḷabyūhasuttaṁ[498] dvādasamaṁ.
- cūlaviyūhasuttaṁ (sī), cūḷaviyūhasutta (syā1-3, pā1) (Word Variant) ↩
- 24Mn:1069 (Cross Reference) ↩
- akkusaloti: akusaloti (ka-sī, syā1-3, pā1) (Word Variant) ↩
- Bālomako: bālo mago (sī, syā1-3, pā1, ka-ma) (Word Variant) ↩
- parihīnapañño: koci nihīnapañño (sī, syā1-3), kocipi nihīnapañño (ka-ma) (Word Variant) ↩
- tathiyanti: tathivanti (syā1-3, ka-ma) (Word Variant) ↩
- aññe: aññepi (syā1-3 24Mn:1104), aññe ca (?) (Word Variant) ↩
- te: nānāto (ka-ma) (Word Variant) ↩
- Atisāradiṭṭhiyā: atīsaraṁditthiyā (pā1), atisāradiṭṭhiyāva (cha1-2) cha-a ; 24Mn:1144 (Word Variant) ↩
- te: suddhimakevali te (sī), suddhimakevalīno (ka-sī, pā1) (Word Variant) ↩
- tebhirattā: tyābhirattā (syā1-3, ka-ma) (Word Variant) ↩
- medhagamāvaheyya: medhagaṁ āvaheyya (sī, syā1-3), medhakaṁ āvaheyya (pā1) (Word Variant) ↩
- Uddhaṁsa: uddhaṁ so (sī, syā1-3, pā1) (Word Variant) ↩
- Cūḷabyūhasuttaṁ: cūḷaviyūhasuttaṁ (sī, syā1-3, pā1) (Word Variant) ↩