Cūḷavagga
Āmagandhasutta
242. 279 “Sāmākaciṅgūlakacīnakāni ca,
Pattapphalaṁ mūlaphalaṁ gavipphalaṁ;
Dhammena laddhaṁ satamasnamānā[155],
Na kāmakāmā alikaṁ bhaṇanti. (1)
243. 280 Yadasnamāno sukataṁ suniṭṭhitaṁ,
Parehi dinnaṁ payataṁ paṇītaṁ;
Sālīnamannaṁ paribhuñjamāno,
So bhuñjasī kassapa āmagandhaṁ. (2)
244. 281 Na āmagandho mama kappatīti,
Icceva tvaṁ bhāsasi brahmabandhu;
Sālīnamannaṁ paribhuñjamāno,
Sakuntamaṁsehi susaṅkhatehi;
Pucchāmi taṁ kassapa etamatthaṁ,
Kathaṁpakāro tava āmagandho”. (3)
245. 282 “Pāṇātipāto vadhachedabandhanaṁ,
Theyyaṁ musāvādo nikativañcanāni ca;
Ajjhenakuttaṁ paradārasevanā,
Esāmagandho na hi maṁsabhojanaṁ. (4) [156]
246. 283 Ye idha kāmesu asaññatā janā,
Rasesu giddhā asucibhāvamassitā[157];
Natthikadiṭṭhī visamā durannayā,
Esāmagandho na hi maṁsabhojanaṁ. (5)
247. 284 Ye lūkhasā dāruṇā piṭṭhimaṁsikā[158],
Mittadduno nikkaruṇātimānino;
Adānasīlā na ca denti kassaci,
Esāmagandho na hi maṁsabhojanaṁ. (6)
248. 285 Kodho mado thambho paccupaṭṭhāpanā[159],
Māyā usūyā bhassasamussayo ca;
Mānātimāno ca asabbhi santhavo,
Esāmagandho na hi maṁsabhojanaṁ. (7)
249. 286 Ye pāpasīlā iṇaghātasūcakā,
Vohārakūṭā idha pāṭirūpikā[160];
Narādhamā yedha karonti kibbisaṁ,
Esāmagandho na hi maṁsabhojanaṁ. (8)
250. 287 Ye idha pāṇesu asaññatā janā,
Paresamādāya vihesamuyyutā;
Dussīlaluddā pharusā anādarā,
Esāmagandho na hi maṁsabhojanaṁ. (9)
251. 288 Etesu giddhā viruddhātipātino,
Niccuyyutā pecca tamaṁ vajanti ye;
Patanti sattā nirayaṁ avaṁsirā,
Esāmagandho na hi maṁsabhojanaṁ. (10)
252. 289 Na macchamaṁsānamanāsakattaṁ[161],
Na naggiyaṁ na muṇḍiyaṁ jaṭājallaṁ;
Kharājināni nāggihuttassupasevanā,
Ye vāpi loke amarā bahū tapā;
Mantāhutī yaññamutūpasevanā,
Sodhenti maccaṁ avitiṇṇakaṅkhaṁ. (11)
253. 290 Sotesu gutto viditindriyo care,
Dhamme ṭhito ajjavamaddave rato;
Saṅgātigo sabbadukkhappahīno,
Na lippati[163] diṭṭhasutesu dhīro”. (12) [162]
254. 291 Iccetamatthaṁ bhagavā punappunaṁ,
Akkhāsi naṁ[164] vedayi mantapāragū;
Citrāhi gāthāhi munī pakāsayi,
Nirāmagandho asito durannayo. (13)
255. 292 Sutvāna buddhassa subhāsitaṁ padaṁ,
Nirāmagandhaṁ sabbadukkhappanūdanaṁ;
Nīcamano vandi tathāgatassa,
Tattheva pabbajjamarocayitthāti. (14)
293 Āmagandhasuttaṁ dutiyaṁ.
- satamasnamānā: satamasamānā (ka-sī), satamassamānā (syā1-3, kaṃ), satam añhamānā (pā1) (Word Variant) ↩
- Ajjhenakuttaṁ: ajjhenakujjhaṁ (sī), ajjhenakujjaṁ (ka-sī, pā1) (Word Variant) ↩
- asucibhāvamassitā: asucīkamissitā (sī, kaṃ, pā1), asucīkamissatā (syā1-3) (Word Variant) ↩
- piṭṭhimaṁsikā: ... dāruṇa ... (syā1-3), ye lūkharasā dāruṇā parapiṭṭhimaṁsikā (ka-ma) (Word Variant) ↩
- paccupaṭṭhāpanā: paccuṭṭhāpanā ca (sī, syā1-3, pā1) (Word Variant) ↩
- pāṭirūpikā: pātirūpikā (ka-sī) (Word Variant) ↩
- macchamaṁsānamanāsakattaṁ: na macchamaṁsaṁ na anāsakattaṁ (sī), na macchamaṁsaṁ nānāsakattaṁ (syā1-3, pā1, ka-ma) aṭṭhakathā (Word Variant) ↩
- Sotesu: yo tesu (syā1-3, ka-ma) (Word Variant) ↩
- lippati: na limpati (syā1-3, kaṃ, ka-ma) (Word Variant) ↩
- naṁ: taṁ (ka-sī, pā1) (Word Variant) ↩