Cūḷavagga
Ratanasutta
224. 260 [139] [138] Yānīdha bhūtāni samāgatāni,
Bhummāni vā yāni va antalikkhe;
Sabbeva bhūtā sumanā bhavantu,
Athopi sakkacca suṇantu bhāsitaṁ. (1) [140]
225. 261 Tasmā hi bhūtā nisāmetha sabbe,
Mettaṁ karotha mānusiyā pajāya;
Divā ca ratto ca haranti ye baliṁ,
Tasmā hi ne rakkhatha appamattā. (2)
226. 262 Yaṁ kiñci vittaṁ idha vā huraṁ vā,
Saggesu vā yaṁ ratanaṁ paṇītaṁ;
Na no samaṁ atthi tathāgatena,
Idampi buddhe ratanaṁ paṇītaṁ;
Etena saccena suvatthi hotu. (3)
227. 263 Khayaṁ virāgaṁ amataṁ paṇītaṁ,
Yadajjhagā sakyamunī samāhito;
Na tena dhammena samatthi kiñci,
Idampi dhamme ratanaṁ paṇītaṁ;
Etena saccena suvatthi hotu. (4)
228. 264 Yaṁ buddhaseṭṭho parivaṇṇayī suciṁ,
Samādhimānantarikaññamāhu;
Samādhinā tena samo na vijjati,
Idampi dhamme ratanaṁ paṇītaṁ;
Etena saccena suvatthi hotu. (5)
229. 265 [141] Ye puggalā aṭṭha sataṁ pasatthā,
Cattāri etāni yugāni honti;
Te dakkhiṇeyyā sugatassa sāvakā,
Etesu dinnāni mahapphalāni;
Idampi saṁghe ratanaṁ paṇītaṁ,
Etena saccena suvatthi hotu. (6)
230. 266 Ye suppayuttā manasā daḷhena,
Nikkāmino gotamasāsanamhi;
Te pattipattā amataṁ vigayha,
Laddhā mudhā nibbutiṁ[142] bhuñjamānā;
Idampi saṁghe ratanaṁ paṇītaṁ,
Etena saccena suvatthi hotu. (7)
231. 267 [143] Yathindakhīlo pathavissito[144] siyā,
Catubbhi vātehi asampakampiyo;
Tathūpamaṁ sappurisaṁ vadāmi,
Yo ariyasaccāni avecca passati;
Idampi saṁghe ratanaṁ paṇītaṁ,
Etena saccena suvatthi hotu. (8)
232. 268 Ye ariyasaccāni vibhāvayanti,
Gambhīrapaññena sudesitāni;
Kiñcāpi te honti bhusaṁ pamattā,
Na te bhavaṁ aṭṭhamamādiyanti;
Idampi saṁghe ratanaṁ paṇītaṁ,
Etena saccena suvatthi hotu. (9)
233. 269 Sahāvassa dassanasampadāya[145],
Tayassu dhammā jahitā bhavanti;
Sakkāyadiṭṭhī vicikicchitañca,
Sīlabbataṁ vāpi yadatthi kiñci. (10)
234. 270 Catūhapāyehi ca vippamutto,
Chaccābhiṭhānāni abhabba kātuṁ[147];
Idampi saṁghe ratanaṁ paṇītaṁ,
Etena saccena suvatthi hotu[148]. (11) [146]
235. 271 Kiñcāpi so kamma[149] karoti pāpakaṁ,
Kāyena vācā uda cetasā vā;
Abhabba so tassa paṭicchadāya[151],
Abhabbatā diṭṭhapadassa vuttā;
Idampi saṁghe ratanaṁ paṇītaṁ,
Etena saccena suvatthi hotu. (12) [150]
236. 272 Vanappagumbe yatha[152] phussitagge,
Gimhānamāse paṭhamasmiṁ[153] gimhe;
Tathūpamaṁ dhammavaraṁ adesayi,
Nibbānagāmiṁ paramaṁ hitāya;
Idampi buddhe ratanaṁ paṇītaṁ,
Etena saccena suvatthi hotu. (13)
237. 273 Varo varaññū varado varāharo,
Anuttaro dhammavaraṁ adesayi;
Idampi buddhe ratanaṁ paṇītaṁ,
Etena saccena suvatthi hotu. (14)
238. 274 Khīṇaṁ purāṇaṁ nava natthi sambhavaṁ,
Virattacittāyatike bhavasmiṁ;
Te khīṇabījā avirūḷhichandā,
Nibbanti dhīrā yathāyaṁ[154] padīpo;
Idampi saṁghe ratanaṁ paṇītaṁ,
Etena saccena suvatthi hotu. (15)
239. 275 Yānīdha bhūtāni samāgatāni,
Bhummāni vā yāni va antalikkhe;
Tathāgataṁ devamanussapūjitaṁ,
Buddhaṁ namassāma suvatthi hotu. (16)
240. 276 Yānīdha bhūtāni samāgatāni,
Bhummāni vā yāni va antalikkhe;
Tathāgataṁ devamanussapūjitaṁ,
Dhammaṁ namassāma suvatthi hotu. (17)
241. 277 Yānīdha bhūtāni samāgatāni,
Bhummāni vā yāni va antalikkhe;
Tathāgataṁ devamanussapūjitaṁ,
Saṁghaṁ namassāma suvatthi hotūti. (18)
278 Ratanasuttaṁ paṭhamaṁ.
- cullavaggo (sī), cūlavaggo (pā1) (Word Variant) ↩
- 18Kh:45 (Cross Reference) ↩
- Bhummāni: bhūmāni (ka-ma) (Word Variant) ↩
- 18Kh:50; 19Vv:597 (Cross Reference) ↩
- nibbutiṁ: nibbuti (ka-ma) (Word Variant) ↩
- 18Kh:52-53; 27Ne:991 (Cross Reference) ↩
- pathavissito: paṭhaviṁ sito (sī, syā1-3, kaṃ, pā1), paṭhavissito (ka-sī) (Word Variant) ↩
- dassanasampadāya: sahāvasaddassanasampadāya (ka-ma) (Word Variant) ↩
- Dhaccābhiṭhānāni: cha cābhiṭhānāni (sī, syā1-3, pā1) (Word Variant) ↩
- kātuṁ: abhabbo kātuṁ (sī, syā1-3) (Word Variant) ↩
- hotu: idaṁ gāthā sī potthake (Word Variant) ↩
- kamma: kammaṁ (sī, syā1-3, kaṃ, pā1) (Word Variant) ↩
- Abhabba: abhabbo (bahūsu) (Word Variant) ↩
- paṭicchadāya: paṭicchādāya (sī) (Word Variant) ↩
- yatha: yathā (sī, syā1-3, pā1) (Word Variant) ↩
- paṭhamasmiṁ: paṭhamasmi (?) (Word Variant) ↩
- yathāyaṁ: yathāyam (sī, syā1-3), yathayaṁ (ka-ma) (Word Variant) ↩